तेजोमय नादब्रह्म कार्यक्रमाने रसिकांची मने जिंकली

इचलकरंजी दि. २८ ऑक्टोबर-

हिंदी आणि मराठी चित्रपटांमधील शास्त्रीय व निमशास्त्रीय शैलीतील त्याचबरोबर अविस्मरणीय अशा विविध प्रकारच्या सदाबहार गीतांच्या ‘तेजोमय नादब्रह्म’ या सुरेल कार्यक्रमाने सर्व रसिकांची मने जिंकून घेतली आणि त्यांचा मनमोकळा प्रतिसाद मिळविला. हिंदी चित्रपट संगीताच्या अभ्यासक आणि सुप्रसिद्ध गायिका डॉ. मृदुला दाढे जोशी, मुंबई यांचा शास्त्रशुद्ध पाया असलेला मधूर स्वर त्याचबरोबर सहगायक नीलेश निरगूडकर व कश्मिरा राईलकर यांचेही उत्कृष्ट गायन आणि मंदार खराडे यांचे उत्तम व माहितीपूर्ण निवेदन यामुळे हा कार्यक्रम ती‌न तास उत्तरोत्तर रंगत गेला. सर्वच कसलेल्या वादक कलाकारानी सुंदर अशी साथसंगत केल्यामुळे एकूणच कार्यक्रम दर्जेदार झाला. बाराशे आसन क्षमतेचे संपूर्ण नाट्यगृह भरून जवळ जवळ दोनशे रसिकांनी उभे राहून या कार्यक्रमाचा आस्वाद घेतला.

येथील मनोरंजन मंडळ, श्री दगडूलाल मर्दा फौंडेशन, रोटरी क्लब सेंट्रल, रोटरी क्लब टेक्स्टाईल सिटी, रोटरी क्लब एक्झिक्युटिव्ह आणि नारायणदास दामोदर भंडारी फौंडेशन यांच्या संयुक्त विद्यमाने   दिवाळी पहाट उपक्रमाच्या अंतर्गत हा कार्यक्रम आयोजित करण्यात आला. कार्यक्रमाच्या प्रारंभी प्रमुख पाहुणे, इचलकरंजी महानगरपालिकेचे आयुक्त व प्रशासक ओमप्रकाश दिवटे व सौ. निलिमा दिवटे, त्याचबरोबर राजेश काजवे व सौ. सविता काजवे कोल्हापूर, अतुल शहा,‌ भिकुलाल मर्दा व सौ. प्रभा मर्दा, यतिराज भंडारी आणि मृदुला दाढे यांच्या हस्ते दीप प्रज्वलन व नटराज प्रतिमा पूजन करण्यात आले. याप्रसंगी सर्व संयोजक संस्थांचे प्रतिनिधी समीर गोवंडे, शामसुंदर मर्दा, सतीश पाटील, निनू लांबा, गणेश निकम आणि यतिराज भंडारी व्यासपीठावर उपस्थित होते.