लग्नाच्या वादातून युवकाने पोलीस ठाण्यासमोर पेटवून घेतले, प्रकृती चिंताजनक
इचलकरंजी:
विवाहाच्या वादातून तरुणाने स्वतःला पेटवून घेण्याचा प्रयत्न केल्याची धक्कादायक घटना शिवाजीनगर पोलीस ठाण्यासमोर घडली आहे. शेखर अर्जुन गायकवाड (वय ३१, रा. करकंभ, ता. पंढरपूर, जि. सोलापूर) याने इचलकरंजी येथील शिवाजीनगर पोलीस ठाण्यासमोर स्वतःच्या अंगावर पेट्रोल टाकून आत्मदहनाचा प्रयत्न केला.
यामध्ये तो ६० टक्के भाजला असून, नागरिक व पोलिसांच्या मदतीने तातडीने इंदिरा गांधी सामान्य रुग्णालयात दाखल करण्यात आले. पुढील उपचारासाठी त्याला कोल्हापूर येथील सीपीआर रुग्णालयात हलवण्यात आले असून त्याची प्रकृती चिंताजनक आहे.
प्राप्त माहितीनुसार, गायकवाड यांनी इचलकरंजीतील एका महिलेशी विवाह केला होता. मात्र त्यांच्यात वाद निर्माण झाल्याने सदर महिला दुसरे लग्न करण्याच्या तयारीत होती. यामुळे शेखर गायकवाड हे शिवाजीनगर पोलीस ठाण्यात आले होते. पोलिसांनी त्यांना काही वेळ थांबण्याचा सल्ला दिला. मात्र पोलीस ठाण्यातून बाहेर पडताच त्यांनी स्वतःला पेटवून घेतले.ही घटना पाहताच नागरिक आणि पोलिसांनी प्रसंगावधान राखून तातडीने त्याला रुग्णालयात दाखल केले. सध्या त्याच्यावर उपचार सुरू असून त्याची प्रकृती चिंताजनक आहे.गायकवाड यांच्यावर विविध कोर्टात फसवणूक,बायकोस मारहाण करणे अशा स्वरूपाचे गुन्हे दाखल आहेत.
Author: ICHMH51 NEWS ABHIJIT PATWA
घडामोडी वस्त्रनगरीच्या... इचलकरंजी शहरातील चालू घडामोडी, ब्रेकिंग न्यूज आपल्याला समजाव्यात यासाठी हे पोर्टल सुरू केले असून नागरी समस्यांना वाचा फोडून त्या मार्गी लावण्यासाठी आम्ही प्रयत्नशील आहोत. अधिक माहिती,बातम्या व जाहिरातीसाठी संपर्क- अभिजित राजेंद्र पटवा,इचलकरंजी. 9921600800
