जर्मनी गँग’चा टोळीप्रमुख आनंदा जर्मनी अखेर गजाआड; १६ गंभीर गुन्ह्यांमध्ये होता फरार

इचलकरंजी –

कोल्हापूर जिल्ह्यातील कुख्यात ‘जर्मनी गँग’चा प्रमुख आनंदा शेखर जाधव उर्फ जर्मनी (वय २०, रा. कबनूर,ता. हातकणंगले) याला अखेर पोलिसांनी अटक केली आहे. त्याच्यावर खुनाचा प्रयत्न, मारहाण, धमकी, संघटित गुन्हेगारीसह तब्बल १६ गंभीर गुन्ह्यांची नोंद असून, सात वेळा मोक्का कायद्यांतर्गत कारवाई झाली आहे.

शिवाजीनगर पोलीस ठाणे (जि. कोल्हापूर) येथे दाखल विविध गुन्ह्यात तसेच (मोक्का) अंतर्गत त्याच्यावर गुन्हा दाखल करण्यात आला होता. या प्रकरणात मोक्का कलमे लागू झाल्यानंतर जाधव फरार झाला होता.

दरम्यान, सातारा शहर पोलीस ठाणे हद्दीत दाखल गुंह्यात अटकेत आला. त्यानंतर त्याला सातारा मध्यवर्ती कारागृहात न्यायालयीन कोठडीत ठेवण्यात आले.शिवाजीनगर पोलिसांनी त्याच्याविरोधात प्रोडक्शन वॉरंट प्राप्त करून ९ एप्रिल २०२५ रोजी अटक केली. न्यायालयाने त्याला ११ एप्रिल २०२५ पर्यंत पोलीस कोठडी सुनावली आहे.

जाधववर आधीच विविध ठिकाणी गंभीर स्वरूपाचे गुन्हे दाखल आहेत. या गुन्ह्यात अटकेत असलेल्या इतर आरोपींच्या जामिनाबाबत न्यायालयात अपील दाखल करण्यात आले असून, त्यांचे जामीन रद्द झाल्यानंतर उर्वरित आरोपींना देखील अटक करण्यात येणार आहे.

सदर गुन्ह्यात मोक्का कलमे लावण्याचा प्रस्ताव तत्कालीन तपासी अधिकारी पोलीस उपनिरीक्षक मनोज पाटील यांनी वरिष्ठ अधिकार्‍यांच्या मार्गदर्शनाखाली सादर केला होता. या प्रस्तावाला विशेष पोलीस महानिरीक्षक, कोल्हापूर परिक्षेत्र यांनी मंजुरी दिल्यानंतर संबंधित कलमे गुन्ह्यात समाविष्ट करण्यात आली.

या प्रकरणाचा तपास सध्या उपविभागीय पोलीस अधिकारी समीरसिंह साळवे (इचलकरंजी विभाग) करत आहेत.