यड्राव फाटा येथे वाहतूक नियंत्रण करणे आले अंगलट चालकास मारहाण; तिघांविरुद्ध गुन्हा
शहापूर:
यड्राव फाटा चौकात वाहतूक सुरळीत करण्याचे काम करत असताना चालकास तिघा अज्ञात इसमांनी मारहाण केल्याची घटना शुक्रवारी सायंकाळी घडली. याप्रकरणी शहापूर पोलीस ठाण्यात अदखलपात्र गुन्हा नोंद करण्यात आला आहे.
तक्रारदार सुभाष बाळोसो पाटील (वय ४२, रा. श्यामनगर, यड्राव फाटा) हे चौकात वाहतूक कोंडी झाल्याने वाहनांना मार्गदर्शन करत होते. त्यावेळी खोतवाडीच्या दिशेने आलेल्या मारुती सुजुकी कंपनीच्या स्पिट कारला थांबण्याचा इशारा करूनही चालकाने वाहन न थांबवता पुढे नेले. त्यानंतर गाडीतून उतरलेल्या तिघा अज्ञात इसमांनी “आमची कार थांबवणार तू कोण?” असे म्हणत पाटील यांना लाथाबुक्यांनी मारहाण केली. या मारहाणीत त्यांच्या चेहऱ्यावर दुखापत झाली.
घटनेनंतर पाटील यांनी रात्री उशिरा पोलीस ठाण्यात तक्रार दिली. पुढील तपास सहायक फौजदार मुंगसे करीत आहेत.
