पाठीमागून टेम्पोची धडक; दुचाकीस्वाराचा मृत्यू, चालकावर गुन्हा
इचलकरंजी :
शाहूनगर-चंदूर परिसरात झालेल्या भीषण अपघातात गंभीर जखमी झालेल्या दुचाकीस्वाराचा उपचारादरम्यान मृत्यू झाल्याने टेम्पो चालकाविरुद्ध गुन्हा दाखल करण्यात आला आहे.
पोलिसांकडून मिळालेल्या माहितीनुसार, १८ जून रोजी सायंकाळी सुमारे ६.१५ वाजण्याच्या सुमारास आभार फाट्याकडे जात असताना जिव्हाजी बँकेसमोर टेम्पो (एमएच-०५-बीएच-९२०१) चालक मोहम्मद साद सब्बीर पिंजारी (वय २३, रा. दत्तवाड, ता. शिरोळ) याने रस्त्याच्या परिस्थितीकडे दुर्लक्ष करून बेदरकारपणे वाहन चालवत पाठीमागून दुचाकी (एमएच-०९-सीसी-१५२८) ला जोरदार धडक दिली. या अपघातात दुचाकीस्वार बळवंत आश्राप्पा देसाई (वय ५७, रा. शाहूनगर गल्ली क्र. ४, चंदूर, ता. हातकणंगले) हे गंभीर जखमी झाले. उपचार सुरू असताना त्यांचा मृत्यू झाला.
या प्रकरणी मयताचे पुत्र किशोर बळवंत देसाई यांनी दिलेल्या फिर्यादीवरून शिवाजीनगर पोलीस ठाण्यात गुन्हादाखल करण्यात आला आहे.पुढील तपास पोलीस उपनिरीक्षक गवळी करीत आहेत.
