मुख्यमंत्री धर्मादाय देणगी निधीतून आपटे वाचन मंदिराला पन्नास लाखांची मदत

इचलकरंजी- येथील शतकोत्तर सुवर्णमहोत्सवी आपटे वाचन मंदिराच्या विविध भावी उपक्रमांसाठी मुख्यमंत्री धर्मादाय देणगी निधीतून मुख्यमंत्री एकनाथ शिंदे यांच्या मान्यतेने पन्नास लाख रुपयांचे अर्थसहाय्य मंजूर करण्यात आले आहे. याबाबतचा शासन निर्णय वाचन प्रेरणा दिनाच्या आदल्या दिवशीच महाराष्ट्र शासनाचे सामान्य प्रशासन विभागाच्या कक्ष अधिकारी पूनम निकम यांनी निर्गमित केला आहे.

आपटे वाचन मंदिर हे महाराष्ट्रातील एक नामांकित आणि उपक्रमशील ग्रंथालय असून परिसरात वाचन संस्कृतीचा विकास करण्यासाठी प्रयत्नशील आहे. ७०,००० पेक्षा अधिक ग्रंथसंख्या असणाऱ्या या ग्रंथालयाचे चार हजारांहून अधिक सभासद आहेत. आपटे वाचन मंदिरात काही दुर्मिळ आणि प्राचीन ग्रंथ असून शंभर वर्षापूर्वीची अनेक पेटींग्ज आहेत. विविध वयोगटांच्या वक्तृत्व स्पर्धा, कथाकथन स्पर्धा, शिक्षक गौरव पुरस्कार, ग्रंथप्रदर्शन, बाल वाचन संस्कार शिबीर, असे विविध उपक्रम ग्रंथालयातर्फे राबवले जातात. गेल्या २० वर्षाहूनही अधिक काळापासून साहित्यकृती पुरस्कार दिले जातात. ग्रंथालयाची व्याख्यानमाला गेली ५० वर्षे अव्याहतपणे सुरु आहे.

ग्रंथालयाच्या अध्यक्ष सुषमा दातार यांनी या अर्थसहाय्याबद्दल मुख्यमंत्री एकनाथ शिंदे यांना धन्यवाद व्यक्त केले आहेत. मुख्यमंत्र्यांचे अतिरिक्त मुख्य सचिव आणि इचलकरंजीचे सुपुत्र विकास खारगेसाहेब आणि सहसचिव व्यंकटेश भटसाहेब यांची मोलाची मदत हे अर्थसहाय्य मिळण्यात झाल्याचे सुषमा दातार यांनी सांगितले. या निधीतून पुस्तके ठेवण्यासाठी कॉम्पॅक्टर्स, कलादालन आणि बालविभागाचे नूतनीकरण, दुर्मिळ व जुन्या पुस्तकांचे डीजीटायझेशन, संदर्भ विभागाचे आधुनिकीकरण, परिसरातील शाळांसाठी फिरते ग्रंथालय व ज्येष्ठ नागरिकांसाठी घरपोच पुस्तक योजना, ग्रंथ आणि बालसाहित्य खरेदी, इचलकरंजी नावाचा इतिहास आणि वारसा यांची जपणूक करणारे दालन अशा विविध भावी उपक्रमांची पूर्तता होण्यास सहाय्य होईल असेही त्यांनी सांगितले. इचलकरंजी परिसराची सांस्कृतिक आणि साहित्यिक ओळख असणारे हे ग्रंथालय अनेकांच्या योगदानातून वर्षानुवर्षे कार्यरत असून यानिमित्ताने ग्रंथालयाच्या उपक्रमांना भरीव राजमान्यता मिळाली असल्याचेही त्यांनी सांगितले. याप्रसंगी उपाध्यक्ष हर्षदा मराठे, कार्यवाह माया कुलकर्णी, सहकार्यवाह डॉ. कुबेर मगदूम व संचालक उपस्थित होते.