इचलकरंजी शहरात दिवाळीमध्ये मुख्य रस्त्यावर बसणाऱ्या  विक्रेत्यांनी नियमांचे काटेकोरपणे पालन करावे अन्यथा कारवाई केली जाणार :-आयुक्त ओमप्रकाश दिवटे

      इचलकरंजी शहरात दिवाळीमध्ये श्री शिवतीर्थ ते महात्मा गांधी पुतळा या मुख्य रस्त्यावर मोठा बाजार भरतो.

दोन वर्षांपूर्वी या ठिकाणी एका दुकानास आग लागलेची दुर्घटना घडली होती. सदर आग लागलेल्या ठिकाणी आग विझविण्यासाठी अग्निशमन वाहन जाणेसाठी सुद्धा रस्ता उपलब्ध झालेला नव्हता.

   या अनुषंगाने पोलिस निरिक्षक इचलकरंजी शहर वाहतूक नियंत्रण शाखा यांचे मागणीवरून झालेल्या महानगरपालिका प्रशासन आणि पोलीस प्रशासनाच्या बैठकीत दिवाळी मध्ये मुख्य रस्त्यावर दोन वर्षापुर्वी घडलेल्या आगीच्या दुर्घटनेच्या पार्श्वभूमीवर दिवाळीमध्ये श्री शिवतीर्थ ते महात्मा गांधी पुतळा या मुख्य रस्त्यावर आपत्कालीन परिस्थितीत अग्निशमन वाहन आणि रुग्णवाहिका तसेच निवडणूकीच्या अनुषंगाने शहरात येणाऱ्या राज्य आणि जिल्हा स्तरावरील अधिकारी यांच्या वाहनांना ये जा करणेसाठी ११ फुट रस्ता (जागा) सोडून बॅरिकेट्स लावणेत आलेले आहेत. सदर बॅरिकेट्स लावलेल्या जागेवर कोणीही विक्रेत्यांनी आपले स्टॉल लावू नयेत. जेणेकरून आपत्कालीन परिस्थितीमध्ये आपत्कालीन वाहनासाठी अडथळा निर्माण होऊ नये याची खबरदारी घेण्याची आहे. तरीसुद्धा सदर बॅरिकेट्स लावलेल्या रस्त्यावर विक्रेत्यांनी आपले स्टॉल लावले तर त्यांच्यावर महानगरपालिका आणि पोलीस प्रशासनाकडून कडक कारवाई करणेत येणार आहे.

    तरी बॅरिकेटिंग केलेल्या रस्त्यावर विक्रेत्यांनी आपले स्टॉल लावू नयेत त्याचबरोबर शहरातील नागरिकांनी सुद्धा मुख्य रस्त्यावर खरेदी साठी येताना आपली दुचाकी अथवा चारचाकी वाहने महासत्ता कार्यालयाच्या पाठीमागील बाजूस असलेल्या मोकळ्या जागेत पार्क करावीत,

बॅरिकेटिंग केलेल्या ठिकाणी घेऊन जाण्याचा प्रयत्न करु नये. त्यामुळे घडणाऱ्या कारवाई सारखे कटु प्रसंग टाळण्यासाठी या निर्णयाचे विक्रेते आणि शहरवासीयांनी करावे असे आवाहन आयुक्त तथा प्रशासक ओमप्रकाश दिवटे यांचेकडून करणेत येत आहे.