व्यवसायात यशस्वी होण्यासाठी कष्ट आणि सातत्य आवश्यक- प्रताप पुराणिक
इचलकरंजी:
“कोणताही व्यवसाय यशस्वीपणे करायचा असेल, प्रगती करावयाची असेल तर त्यासाठी ध्येय व उद्दिष्टे ठेवून सातत्याने वाटचाल करणे आणि आणि कष्ट करणे आवश्यक असते. रोटरी संस्था ही व्यवसायात आणि जीवनात उच्च नीतीमूल्ये जोपासण्याच्या उद्देशाने स्थापन झाली आणि त्याचप्रकारे शंभर वर्षाहून अधिक काळ कार्यरत आहे. यशस्वी उद्योजक आणि व्यावसायिकांनीही नीतीमुल्ये जपायला हवीत त्याचबरोबर सामाजिक भान ठेवायला हवे” अशा आशयाचे उदगार रोटरी प्रांत ३१७०चे माजी प्रांतपाल प्रताप पुराणिक कोल्हापूर यांनी काढले. येथील रोटरी क्लब ऑफ इचलकरंजी सेंट्रल, टेक्स्टाईल सिटी, एक्झिक्युटिव्ह आणि युनिटो या सर्व रोटरी क्लबच्या वतीने आयोजित करण्यात आलेल्या व्होकेशनल अवॉर्ड वितरण कार्यक्रमाचे प्रमुख पाहुणे या नात्याने ते बोलत होते.
त्यापुर्वी रोटरी प्रांत ३१७०चे पुढील वर्षीचे नियुक्त प्रांतपाल अरुण भंडारे यांनी शुभेच्छापर मनोगत व्यक्त करताना रोटरीचा विस्तार आणि व्यापकता याबद्दल माहिती दिली. या
अवॉर्ड वितरण कार्यक्रमात किशोर पवार (बायोमेडिकल वेस्ट ट्रीटमेंट फॅसिलिटी), भिकुदास मांडवकर (चहा पावडर उत्पादक), अशोक गदगे (भाजीपाला उत्पादन आणि विक्री), गौतम हळदीकर (इंजीनियरिंग व फाउंड्री उद्योग), सौ. वैशाली वरुटे (होलसेल मिरची व मसाले व्यावसायिक) आणि सौ. राजश्री शेटे (छोटा हॉटेल व्यवसाय) या सर्वांचा सत्कार पाहुण्यांच्या हस्ते सन्मानपत्र, शाल आणि बुके प्रदान करून करण्यात आला.
याप्रसंगी सहाय्यक प्रांतपाल दादासाहेब चौगुले जयसिंगपूर आणि यतिराज भंडारी इचलकरंजी यांनी शुभेच्छापर मनोगत व्यक्त केले. कार्यक्रमात सत्कारमूर्तींनी मनोगत व्यक्त करताना आपली व्यावसायिक वाटचाल सांगितली. कार्यक्रमाच्या सुरुवातीला रोटरी क्लब सेंट्रलचे अध्यक्ष सतीश पाटील यांनी स्वागत व प्रास्ताविक केले तर रोटरी क्लब युनिटोच्या अध्यक्षा त्रिशला चंगेडिया यांनी फोर वे टेस्टचे वाचन केले. पाहुण्यांची ओळख रोटरी क्लब एक्झिक्युटिव्हचे अध्यक्ष गणेश निकम यांनी करून दिली. कार्यक्रमाच्या शेवटी सेंट्रलचे सेक्रेटरी नागेश दिवटे यांनी आभार व्यक्त केले तर सूत्र संचालन संजय होगाडे यांनी केले. येथील रोटरी श्री दगडूलाल मर्दा मानव सेवा केंद्र सभागृहात सदरचा कार्यक्रम पार पडला. कार्यक्रमास निमंत्रित, रोटरी सदस्य आणि सत्कारमूर्ती परिवारातील सदस्य मोठ्या संख्येने उपस्थित होते.
Author: ICHMH51 NEWS ABHIJIT PATWA
घडामोडी वस्त्रनगरीच्या... इचलकरंजी शहरातील चालू घडामोडी, ब्रेकिंग न्यूज आपल्याला समजाव्यात यासाठी हे पोर्टल सुरू केले असून नागरी समस्यांना वाचा फोडून त्या मार्गी लावण्यासाठी आम्ही प्रयत्नशील आहोत. अधिक माहिती,बातम्या व जाहिरातीसाठी संपर्क- अभिजित राजेंद्र पटवा,इचलकरंजी. 9921600800
