शिवाजीनगर पोलीस ठाणे हद्दीत प्राचार्य व मुख्याध्यापक यांची स्नेहसंमेलनाच्या अनुषंगाने बैठक संपन्न

इचलकरंजी:

शिवाजीनगर पोलीस ठाणे हद्दीतील जीजस इंग्लिश मीडियम स्कूल येथे कॉलेज व शाळांच्या प्राचार्य/मुख्याध्यापक यांची स्नेहसंमेलनाच्या नियोजनासाठी बैठक आयोजित करण्यात आली.

बैठकीत स्नेहसंमेलनाच्या कार्यक्रमासाठी पालकांना पासेस देऊन कार्यक्रमास सहभागी होण्याचे नियोजन करण्याचे ठरले. परंतु, माजी विद्यार्थी किंवा बाहेरील अनधिकृत व्यक्तींना प्रवेश दिला जाणार नाही, याची जबाबदारी संबंधित शाळा प्रशासनाने घेण्याचा निर्णय झाला. कार्यक्रम स्थळावर सीसीटीव्ही कॅमेरे बसविणे आणि मुलांमध्ये होणाऱ्या वादविवादांचे निराकरण पालकांना बोलावून करणे यावर भर देण्यात आला.

बैठकीस शिवाजीनगर पोलीस ठाणे हद्दीतील ५६ प्राचार्य, मुख्याध्यापक व प्राध्यापक उपस्थित होते. यावेळी पोलीस निरीक्षकांनी स्नेहसंमेलनादरम्यान सुरक्षेसाठीच्या उपाययोजना स्पष्ट केल्या आणि निर्भया पथक व मुख्याध्यापकांसाठी एक व्हॉट्सअप ग्रुप तयार करण्याचा प्रस्ताव मांडला. या ग्रुपद्वारे शाळा आणि कॉलेजमध्ये मुलींशी संबंधित अडचणींचे तातडीने निराकरण करण्याचे नियोजन आहे.

स्नेहसंमेलनासाठी शाळेची सध्याची मुले व त्यांचे पालक यांनाच प्रवेश दिला जाणार असून, माजी विद्यार्थी किंवा बाहेरील व्यक्तींना प्रवेशबंदी राहील.

शिवाजीनगर पोलीस ठाण्याच्या या नियोजनामुळे कार्यक्रम सुरळीत व सुरक्षित पार पाडण्याचा निर्धार व्यक्त करण्यात आला.