इचलकरंजी:
येथील श्री स्वामी विवेकानंद शिक्षण संस्था कोल्हापूर संचलित श्रीमती आक्काताई रामगोंडा पाटील कन्या महाविद्यालयातील गृह विज्ञान विभागाच्या वतीने विद्यार्थीनींसाठी विवाहपूर्व मार्गदर्शन आणि समुपदेशन या विषयावरती एका विशेष व्याख्यानाचे आयोजन करण्यात आले होते.
या व्याख्यानासाठी प्रमुख पाहुणे म्हणून इंदिरा गांधी मेमोरियल हॉस्पिटलच्या समुपदेशक मा. सौ मनीषा कदम या उपस्थित होत्या, त्यांनी विद्यार्थिनींना विवाहपूर्व मार्गदर्शनाची नितांत आवश्यकता लक्षात आणून दिली आणि विविध प्रश्नांच्या वरती समुपदेशनाद्वारे प्रकाश टाकला.
आपल्या आयुष्यात जोडीदार निवडत असताना कोणती काळजी घ्यावी, विवाह झाल्यानंतर सामाजिक आर्थिक आणि कौटुंबिक, मानसिक स्तरावरती आपण स्थिर कसे राहावे, याशिवाय आयुष्यात घडणाऱ्या नवीन बदलांना कसे सामोरे जावे,
सुखी वैवाहिक जीवनासाठी आपल्या जोडीदारावरती नितांत विश्वास असावा,वेळप्रसंगी तडजोड करता यावी, आर्थिक दृष्ट्या आपण स्वतःच्या पायावरती सक्षम असणे यासह अनेक विषयांवर ती चर्चा करण्यात आली.
यावेळी महाविद्यालयाचे प्राचार्य डॉ.बाबासाहेब दुधाळे हे अध्यक्षस्थानी होते. त्यांनी विद्यार्थिनींना आपली सद्सदविवेक बुध्दी जागृत ठेवून जोडीदाराची निवड करावी, प्रथम स्वतःच्या पायावरती उभे राहावे असा सल्ला दिला.
या कार्यक्रमाचे स्वागत प्रास्ताविक आणि प्रमुख पाहुण्यांची ओळख प्रा.स्वाती हळवणकर यांनी करून दिली तर सूत्रसंचालन प्रा हेमलता देसाई यांनी केले. आभार प्रा. मेघा देसाई यांनी मानले.
या कार्यक्रमासाठी महाविद्यालयातील सर्व गुरुदेव कार्यकर्ते,प्रशासकीय सेवक, शिक्षकेतर कर्मचारी आणि विद्यार्थिनी बहुसंख्येने उपस्थित होत्या.
