सर्व श्रमिक संघटनेच्या वतीने घरेलू महिला कामगारांच्या मागण्यांसाठी निवेदन सादर
इचलकरंजी:
सर्व श्रमिक संघटनेच्या वतीने घरगुती महिला कामगारांच्या विविध मागण्यांसाठी आज सहाय्यक कामगार आयुक्त, इचलकरंजी यांच्याकडे निवेदन सादर करण्यात आले.
घरेलू महिला कामगार संघटनेच्या वतीने देण्यात आलेल्या निवेदनात घरकाम करणाऱ्या महिलांच्या अडचणी आणि त्यांना मिळणाऱ्या तुटपुंज्या मोबदल्याचा उल्लेख करण्यात आला. स्वयंपाक, धुणी-भांडी, फरशी पुसणे यांसारखी कामे करणाऱ्या महिलांना महिन्याच्या शेवटी केवळ ५००-६०० रुपये मिळतात. सुट्टी घेण्यास मनाई असते, तसेच जरी थोडा वेळ उशीर झाला तरीही त्यांचा दिवसाचा पगार कपात केला जातो, असे निवेदनात नमूद करण्यात आले आहे.
घरगुती महिला कामगारांना कायदेशीर संरक्षण मिळावे, त्यांच्यासाठी सामाजिक सुरक्षा योजना लागू कराव्यात, तसेच त्यांना आरोग्य व शिक्षणासाठी आर्थिक मदत मिळावी, अशा विविध मागण्या निवेदनात मांडण्यात आल्या. तसेच, ६० वर्षांनंतर कामगारांना किमान ३००० रुपये पेन्शन मिळावी, गृहपयोगी संच वितरित करावा आणि घरकुल योजना राबवावी, अशाही प्रमुख मागण्या करण्यात आल्या.या मागण्या पूर्ण करण्यासाठी २०२५ च्या अर्थसंकल्पात आवश्यक तरतूद करावी आणि महाराष्ट्र घरेलू कामगार कल्याण मंडळ अधिक सक्षम करावे, अशी मागणी संघटनेने केली आहे.
निवेदनाच्या प्रती मुख्यमंत्री देवेंद्र फडणवीस, उपमुख्यमंत्री एकनाथ शिंदे,अजितदादा पवार, उपमुख्यमंत्री,आकाश फुंडकर, कामगार मंत्री, विकास आयुक्त (असंघटित कामगार), प्रभादेवी,सहाय्यक कामगार आयुक्त,महाराष्ट्र घरेलू कामगार कल्याण मंडळ, इचलकरंजी यांना देण्यात आल्या आहेत.
