इचलकरंजीकरानी रेल्वेचा रेटा खासदार मानेंच्या पाठीमागे लावावा–रेल्वे कृती समिती

इचलकरंजी-

नियोजित हातकणंगले इचलकरंजी रेल्वे मार्गासाठी येथील नागरिक व्यापारी व प्रवाशानी खासदार धैर्यशील माने यांच्याकडे पाठपुरावा करावा अशी मागणी रेल्वे कृती समितीच्या वतीने करण्यात येत आहे.

      हातकणंगले इचलकरंजी हा आठ किलोमीटरचा रेल्वे मार्ग मंजूर होऊन बरीच वर्षे झाले पण निधी अभावी हा प्रचंड रखडला. रेल्वे कृती समिती सतत राज्य सरकार व केंद्र सरकार तसेच आपल्या भागातील खासदार धैर्यशील माने यांच्याकडे पाठपुरावा करत आहे पण ते म्हणावे तसा प्रतिसाद देत नसल्याने समस्त इचलकरंजी करातून नाराजी व्यक्त होत आहे.

प्रकल्प सुरू करण्यासाठी राज्य व केंद्र सरकार यांचा खर्चाचा निम्मा निम्मा हिस्सा भरणे आवश्यक आहे. तत्कालीनमुख्यमंत्री एकनाथ शिंदे कोल्हापूर दौऱ्यावर आले असता त्यांनी त्या प्रकल्पासाठी निधी कमी पडू देणार नाही अशी घोषणा केली होती. तर लोकसभा निवडणुकी वेळी याचे पुन्हा आश्वासन दिले गेले. निवडून आल्यानंतर खासदार धैर्यशील माने सोईस्कररित्या विसरून गेले फक्त रेल्वे विषयी गोड गोड बोलणे एवढेच काम त्यांचे राहिले आहे. इचलकरंजीतील वस्त्रोद्योग व्यवसायातील सुत, कापड यांची आवक मोठ्या प्रमाणात आहे. देशातील प्रवासी इचलकरंजीला जोडला जाणार असल्याने हा प्रकल्प फायद्याचा ठरणार आहे.  त्यासाठी खासदारांचे प्रयत्न महत्त्वाचे आहेत. गेली पाच वर्ष रेल्वे कृती समिती त्यांच्याकडे पाठपुरावा करते आहे पण केवळ आश्वासनावरच बोळवण केली जाते.

 गेल्या दोन दिवसांपूर्वी येथील काही व्यापाऱ्यांनी खासदार धैर्यशील माने यांच्याकडे हातकणंगले रेल्वे स्टेशन वरील सुविधा बाबत निवेदन दिले ते गरजेचे असले तरी व्यापारी वर्गानीही इचलकरंजी रेल्वेसाठी खासदार धैर्यशील माने यांच्यावर दबाव टाकावा व रेल्वे प्रकल्प पूर्ण करण्यासाठी साथ द्यावी अशी मागणी रेल्वे कृती समितीच्या वतीने करण्यात येत आहे.