खंडणीसाठी मारहाण व दमदाटी प्रकरणी भाजपच्या माजी नगरसेवकासह तिघांवर गुन्हा दाखल

इचलकरंजी:

इचलकरंजी येथील डायना स्टार सीएनसी मशीन वर्कशॉपजवळील एका ऑफिसवजा रूममध्ये एका तरुणाला पाच लाख रुपयांची खंडणी मागून दमदाटी व मारहाण केल्याप्रकरणी भाजपच्या माजी मगरसेवक मनोज साळुंखे, शहानवाज मुजावर,बाजीराव कुंभार यांच्यावर गुन्हा दाखल करण्यात आला आहे.

पोलिसांकडून मिळालेल्या माहितीनुसार, पंकज सुभाष दानवाडे (वय २९, व्यवसाय – सराफ, रा. दत्तवाड, ता. शिरोळ, जि. कोल्हापूर) यांनी दिलेल्या फिर्यादीवरून १४ मार्च रोजी रात्री ८.४५ वाजता सुरू होऊन १८ मार्च रोजी दुपारी ४ वाजेपर्यंत सुरू होता. फिर्यादीला जबरदस्तीने एका खोलीत डांबून आरोपींनी शिवीगाळ, दमदाटी व मारहाण करत पाच लाख रुपयांची मागणी केली. भीतीपोटी फिर्यादीने ५० हजार रुपये दिले असतानाही आरोपींनी उर्वरित ४.५० लाख रुपये देण्यासाठी धमकी दिली. “तू उर्वरित पैसे दिले नाहीस तर तुला उघडानागडा करून तुझा व्हिडीओ व्हायरल करू, पोलिसांकडे गेलास तर तुझ्यावर खोटे गुन्हे दाखल करू,” अशी धमकी आरोपींनी दिली.त्यानंतर भीतीत असलेल्या फिर्यादीने पोलिसांकडे धाव घेत गुन्हा नोंदवला. याप्रकरणी पुढील तपास शिवाजीनगर पोलिस ठाण्याचे पो नि सचिन पाटील यांच्या मार्गदर्शनाखाली पोसई साने करत आहेत.

फोटो-मनोज साळुंखे