इचलकरंजीत घरफोडी; १.४५ लाखांचा ऐवज लंपास

इचलकरंजीत घरफोडी; १.४५ लाखांचा ऐवज लंपास

इचलकरंजी – येथील कागवाडे मळा परिसरातील बालाजी अपार्टमेंटमध्ये दि. २६ जून रोजी दुपारी १२ ते १२.३० च्या दरम्यान घरफोडीची घटना घडली असून, सुमारे १ लाख ४५ हजार ८०० रुपये किंमतीचा ऐवज चोरट्यांनी लंपास केला आहे. याप्रकरणी शिवाजीनगर पोलिस ठाण्यात गुन्हा दाखल करण्यात आला आहे.

फिर्यादी रमेश नारायण कुलकर्णी (वय ६७) हे आपल्या कुटुंबासह बालाजी अपार्टमेंटमध्ये राहतात. आरोपी राकेश मारुती खोत आणि त्याची पत्नी योगिता राकेश खोत हे लंगोटे मळा येथे भाड्याने राहत असून, आरोपीची आई संगिता खोत ही फिर्यादीच्या घरी घरकामासाठी येत असे आणि तिच्याकडे घराची चावी होती.त्याचा गैरफायदा घेत आरोपींनी डुप्लिकेट चावीच्या सहाय्याने कुलकर्णी यांचे घर उघडून घरात प्रवेश केला.कुलकर्णी यांचा मुलगा याने वेळोवेळी राकेशला वेगवेगळ्या कारणासाठी ५० लाख रुपये दिले आहेत.त्याबाबत दावा सुरू आहे.

या दरम्यान चोरट्यांनी घरातून चांदीच्या विविध भांडी व पूजावस्तू (एकूण वजन १ किलो ८६० ग्रॅम) व रोख ९०,००० रुपये असा एकूण १,४५,८०० रुपये किंमतीचा ऐवज चोरून नेला.

याबाबत शिवाजीनगर पोलीस ठाण्यात गुन्हा नोंद करण्यात  आला असून तपास पो.स.ई. खोत पोलीस निरीक्षक दिलीप पवार यांच्या मार्गदर्शनाखाली करत आहेत.