शिवसेना महिला आघाडीच्यावतीने रविवारी मोफत आरोग्य तपासणी शिबिर

इचलकरंजी :

क्रांती ज्योती सावित्रीबाई फुले यांची जयंती व महाराष्ट्राचे लाडके उपमुख्यमंत्री एकनाथजी शिंदे यांच्या होणाऱ्या ६० व्या वाढदिवसानिमित्त  आयोजित ‌‘एकनाथ हिरक आरोग्य वर्ष’ उपक्रमांतर्गत शिवसेना महिला आघाडी (शिंदे गट) व अलायन्स हॉस्पिटल यांच्या संयुक्त विद्यमाने मोफत आरोग्य तपासणी शिबिर आयोजित करण्यात आले आहे. सांगली रस्त्यावर वसुंधरा पब्लिक स्कुल, साळुंखे मळा येथे रविवार दि.५ जानेवारी रोजी सकाळी १० वाजता या शिबिरास प्रारंभ होणार असल्याची माहिती महिला आघाडीच्या जिल्हाप्रमुख सौ.वैशाली डोंगरे यांनी दिली.

खासदार धैर्यशील माने, शिवसेना जिल्हाप्रमुख रविंद्र माने यांच्या मार्गदर्शनाखाली पार पडणाऱ्या या आरोग्य तपासणी शिबिरामध्ये हृदय विकार, मुत्र रोग, नेत्र रोग, अस्थिरोग आदी रोगांवर मोफत तपासणी केली जाणार आहे. या शिबिरामध्ये रुग्णांची तपासणी करण्याकरीता तज्ञ डॉक्टर उपस्थित रहाणार आहेत. आवश्यक असणाऱ्या रुग्णांवर पुढील उपचार करण्यासाठी महात्मा फुले जनआरोग्य योजना अंतर्गत व आरोग्य कर्नाटक योजना अंतर्गत मोफत शस्त्रक्रिया करण्यात येणार आहेत. सदरचे शिबिर यशस्वी करण्यासाठी युवती सेनेच्या जिल्हाप्रमुख सलोनी शिंत्रे, शहरप्रमुख स्नेहांकिता भंडारे, शहरप्रमुख रुपाली चव्हाण, विभागप्रमुख शितल जाधव, शकुंतला पाटील परिश्रम घेत आहेत. सदर शिबिराचा गरजू रुग्णांनी लाभ घ्यावा, असे आवाहन शिवसेना महिला आघाडी व अलायन्स हॉस्पिटल यांच्यावतीने करण्यात आले आहे.