इचलकरंजीतील श्री. रामलिंग चौडेश्वरी मंदिरात हळदी-कुंकू कार्यक्रम उत्साहात
इचलकरंजी:
येथील दातार मळा परिसरातील श्री. रामलिंग चौडेश्वरी लिंगायत कोष्टी समाज मंदिरात संक्रांती निमित्त हळदी-कुंकू कार्यक्रम मोठ्या उत्साहात पार पडला. या कार्यक्रमास प्रमुख पाहुण्या म्हणून माजी नगराध्यक्षा मेघा चाळके, चंदूरच्या उपसरपंच योगिता सचिन हळदे, निवेदिता पेठे आणि राधिका हारुलगे उपस्थित होत्या.
कार्यक्रमाची सुरुवात देवीच्या फोटो पूजन व दीपप्रज्वलनाने झाली. श्रुतिका हारुलगे यांनी उपस्थितांचे स्वागत केले तर राजश्री निलगार यांनी प्रास्ताविक केले. महिला मंडळ अध्यक्षा अन्नपूर्णा लोणी यांनी मंडळ स्थापनेचा उद्देश विशद केला. निवेदिता पेठे यांनी हळदी-कुंकवाचा शास्त्रीय आधार, इतिहास, महिला सबलीकरण आणि संघटन यावर मार्गदर्शन केले. योगिता हळदे यांनी महिला मंडळाच्या भावी कार्यास शुभेच्छा दिल्या, तर मेघा चाळके यांनी स्वच्छ आणि पारदर्शक कारभाराने मंडळाचा उद्देश सफल करण्याचा सल्ला देत सतत पाठीशी राहण्याचे आश्वासन दिले.
कार्यक्रमात मंदिर कमिटी अध्यक्ष, संचालक मंडळ व युवक मंडळाच्या कार्यकर्त्यांचा सत्कार करण्यात आला. चंदूर हटकर कोष्टी समाज अध्यक्ष सचिन हळदे यांचा सत्कार प्रमुख पाहुण्या मेघा चाळके यांच्या हस्ते झाला.
महिलांसाठी मनोरंजन आणि लहान मुलांसाठी नृत्याचा कार्यक्रम विशेष आकर्षण ठरला. सूत्रसंचालन भारती लोणी आणि श्रुतिका हारुलगे यांनी केले, तर उपाध्यक्षा जयश्री बुक्का यांनी आभार मानले.
कार्यक्रम यशस्वी करण्यासाठी अमर सिंदगी, संजय लोणी, नागेश लोणी, शिवलिंगप्पा म्हेत्री, विनायक खराडे, गणेश गुळगी, शिवानंद जेटगी, सागर खराडे यांनी विशेष परिश्रम घेतले. मंदिर कमिटी अध्यक्ष प्रकाश सलगर व सदस्यांनी महत्त्वपूर्ण योगदान दिले. या कार्यक्रमास परिसरातील महिलांची मोठी उपस्थिती होती.
