आमदार राहुल आवाडे यांच्या प्रयत्नांतून इचलकरंजी महानगरपालिकेच्या
प्रलंबित जीएसटी परतावा संदर्भात उपमुख्यमंत्री पवार यांची आज बैठक
इचलकरंजी
इचलकरंजी महानगरपालिकाचे वस्तू व सेवाकर (जीएसटी) पोटी प्रलंबित असलेला कोटीचा परतावा तातडीने मिळावा या संदर्भात आमदार राहुल आवाडे यांनी केलेल्या मागणीनुसार राज्याचे उपमुख्यमंत्री अजितदादा पवार यांच्या अध्यक्षतेखाली सोमवारी सकाळी 10 वाजता विधानभवनात बैठकीचे आयोजन करण्यात आले आहे.
राज्यात सध्या 28 महानगरपालिका असून त्यापैकी २६ महानगरपालिकांना वस्तू व सेवाकर (स्थानिक प्राधिकरण भरपाई अधिनियम २०१७) अन्वये दिले जाते. सन २०२२ मध्ये इचलकरंजी नगरपरिषदेचे रुपांतर महानगरपालिकेत झाले. परंतु जीएसटी परताव्याच्या यादीत इचलकरंजी महानगरपालिकेचे नांवच समाविष्ट करण्यात आलेले नाही. त्यामुळे इचलकरंजी महानगरपालिकेचे तब्बल १०४३.५६ कोटी रुपयांचे अनुदान थकीत आहे. तो मिळावा यासाठी आमदार आवाडे यांनी पाठपुरावा सुरु ठेवला होता. पुणे विभागीय आयुक्त कार्यालयात राज्याचे उपमुख्यमंत्री तथा अर्थमंत्री अजितदादा पवार यांच्या अध्यक्षतेखाली कोल्हापूर जिल्हा वार्षिक नियोजन सन २०२५-२६ ची राज्यस्तरीय बैठक पार पडली. या बैठकीमध्येही आमदार आवाडे यांनी हा मुद्दा उपस्थित केला होता.
अन्य 26 महानगरपालिकांना दिले जात असलेले जकात/स्थानिक संस्था कर भरपाईपोटी देण्यात येणारे अनुदान इचलकरंजी महानगरपालिकेस सुरू करण्याबाबत निर्णय घेऊन प्रलंबित १०४३.५६ कोटी रुपयांचे अनुदान इचलकरंजी महानगरपालिकेस मिळण्यासंदर्भात संबंधित विभागाची बैठक घेण्याची मागणी आमदार आवाडे यांनी उपमुख्यमंत्री अजितदादा पवार यांच्याकडे केली होती. याच संदर्भात अर्थसंकल्पीय अधिवेनशनाच्या पूर्वसंध्येला आमदार आवाडे यांनी उपमुख्यमंत्री पवार यांचेकडे पुन्हा मुद्दा उपस्थित करुन बैठक घेण्याची विनंती केली. त्या अनुषंगाने सोमवार 3 मार्च रोजी सकाळी १० वाजता उपमुख्यमंत्री पवार यांच्या अध्यक्षतेखाली आमदार राहुल आवाडे व संबंधित अधिकार्‍यांच्या उपस्थितीत विधानभवनात ही बैठक होत आहे.
महानगरपालिका स्थापनेपासून पाच वर्षापर्यंत शासनाचे सहाय्यक अनुदान मिळणार आहे. मात्र ही रक्कम सध्या देणी भागवण्यासाठीच खर्ची पडत असल्याने विकासकामांसाठी निधी शिल्लक राहत नाही. सहाय्यक अनुदान बंद झाल्यास कोणतीही विकासकामे होणार नसून आरोग्य, पाणी यासारखी कामे करणे कठीण बनणार आहे. त्यामुळे जीएसटीचा थकित परतावा मिळाल्यास महत्वाची कामे मार्गी लागून शहराचा विकास होण्यास मोठी मदत होणार आहे, असे आमदार आवाडे यांनी सांगितले.
Author: ICHMH51 NEWS ABHIJIT PATWA
घडामोडी वस्त्रनगरीच्या... इचलकरंजी शहरातील चालू घडामोडी, ब्रेकिंग न्यूज आपल्याला समजाव्यात यासाठी हे पोर्टल सुरू केले असून नागरी समस्यांना वाचा फोडून त्या मार्गी लावण्यासाठी आम्ही प्रयत्नशील आहोत. अधिक माहिती,बातम्या व जाहिरातीसाठी संपर्क- अभिजित राजेंद्र पटवा,इचलकरंजी. 9921600800
