इचलकरंजीत महावीर जन्म कल्याणक महोत्सव निमित्त विविध कार्यक्रमाचे आयोजन

इचलकरंजीत महावीर जन्म कल्याणक महोत्सव निमित्त विविध कार्यक्रमाचे आयोजन

इचलकरंजी २९ :

येथील भगवान महावीर जयंती उत्सव मंडळ, सकल जैन समाज इचलकरंजीच्या वतीने भगवान महावीर २६२४ वा जन्म कल्याणक महोत्सवानिमित्त येत्या रविवार ३० मार्च २०२५  पासून विविध कार्यक्रमाचे आयोजन करण्यात आले आहे. महोत्सवातील मुख्य कार्यक्रम १० एप्रिल रोजी होणार असल्याची माहिती उत्सव मंडळाचे कार्याध्यक्ष चंद्रकांत पाटील व सचिव उदय चौगुले यांनी दिली.

सकल जैन समाजाच्या वतीने एकत्रितपणे भगवान महावीर जन्म कल्याणक महोत्सव साजरा करणेची वेगळी परंपरा इचलकरंजी शहरांनी जपली आहे. या परंपरेला यावर्षी 50 वर्षे पूर्ण होत असल्याचेही यावेळी सांगण्यात आले.

इचलकरंजी शहरात देशातील विविध भागातील जैन समाज स्थायिक झाला आहे. येथे समस्त जैन समाजाच्या वतीने व सर्व पंथिय मंदीर कमेटींच्या वतीने एकत्रितपणे भगवान महावीर जन्म कल्याणक महोत्सव साजरा करण्यात येतो. दरवर्षीप्रमाणे यावर्षीही विविध कार्यक्रमाचे आयोजन करण्यात आले आहे.
रविवार ३० मार्च रोजी दुपारी ३ वाजता मुनीश्री १०८ विशाल सागर जी महाराज, मुनीश्री १०८ जवळ सागर जी महाराज व मुनीश्री,१०८ उत्कृष्ट सागरजी महाराज यांच्या सानिध्यामध्ये मोटिवेशनल सेशन होणार आहे. याचबरोबर एक एप्रिल रोजी रक्तदान शिबिर, २ एप्रिल ला प्रश्नमंजुषा वर आधारित चलो बनेंगे धर्मज्ञानी स्पर्धा, ३ एप्रिल रोजी जैन धर्मीय प्रश्नमंजुषा स्पर्धा ४ एप्रिल रोजी पाककला स्पर्धा, ५ एप्रिल ला अष्ट द्रव्य थाळी सजावट स्पर्धा,६ एप्रिल रोजी ट्रेजर हंट ऑन व्हील स्पर्धा आणि रक्तदान शिबिर तर सायंकाळी जैन भजन स्पर्धा होणार आहेत. सोमवार ७ एप्रिल रोजी फ्लॉवर डेकोरेशन स्पर्धा, ८ एप्रिल रोजी “भगवान महावीर सर्वकालीन समस्यांचे समाधान कर्ता ” या विषयावर मुनीश्री १०८ विद्यासागर महाराज यांचे प्रवचन तर ९ एप्रिल रोजी “भगवान महावीर स्वामी के दिव्य संदेश का आज के जीवन मे महत्व”  या विषयावर प.पू. प्रज्ञाभारती सरस्वती श्रीजी यांचे प्रवचन होणार आहे. बुधवार ९ एप्रिल रोजी अष्ट द्रव्य थाळी सजावट स्पर्धा होतील.

गुरुवार १०  एप्रिल रोजी मुख्य कार्यक्रम होणार आहे. आदिनाथ जैन मंदिर, गावभाग येथून प्रभात फेरी आयोजित केली आहे. ही फेरी गुजरी पेठ, कागवाडे मळा, राजवाडा चौक, शांतिनाथ मंदिर, थोरात चौक, बालाजी चौक, शाहू पुतळा मार्गे जैन बोर्डिंग येथील चंद्रप्रभू जैन मंदिर येथे सकाळी ८ वाजता ध्वजारोहण होईल. या दिवशी दोन ठिकाणी रक्तदान शिबिर होणार आहे. सकाळी ९.३० वाजता बहुबली येथील वृद्धाश्रमास साहित्य वाटप तसेच टीबी क्लिनिक येथील रुग्णांना दूध व बिस्कीट वाटप करण्यात येणार आहे. सकाळी 11 वाजता इचलकरंजी नागरिक मंच संचलित अन्नदान श्रेष्ठदान उपक्रमात व  शिवतीर्थ जवळ असलेल्या आनंदगुरु चपाती भाजी सेवा केंद्र या ठिकाणी मिष्ठान भोजनाचे वाटप होईल. सायंकाळी ६ वाजता श्री १००८ भगवान महावीर रथोत्सव सुरू होईल. यावेळी देखावा स्पर्धा आयोजित करण्यात आलेला आहे. जैन धर्मीय विषयावर व समाज प्रबोधनात्मक देखाव्यावर ही स्पर्धा होईल.  गावभाग येथील जैन मंदिर मधून सुरू होणारी ही मिरवणूक नामदेव मैदान या ठिकाणी आल्यानंतर बक्षिस वितरण व सत्कार समारंभाने कार्यक्रम विसर्जित होईल. या कार्यक्रमात श्रावक व श्राविकांनी  मोठ्या संख्येने सहभागी व्हावे असे आवाहन चंद्रकांत पाटील यांनी केले आहे.