इचलकरंजी शहरातील रस्तेकामाचा दर्जा निकृष्ठ,भाजप पदाधिकाऱ्याची तक्रार

इचलकरंजी:

इचलकरंजी: नगरोत्थान योजनेअंतर्गत इचलकरंजी महानगरपालिका हद्दीत सार्वजनिक बांधकाम विभागामार्फत रस्त्यांची कामे सुरू आहेत. मात्र, ही कामे अत्यंत संथगतीने आणि निकृष्ट दर्जाची होत असल्याने नागरिकांमध्ये तीव्र संतापाची लाट उसळली आहे. विशेषतः सांगली रोड ते वडगाव बाजार समिती परिसर रस्ता अत्यंत खराब अवस्थेत असून, शाळा, महाविद्यालयीन विद्यार्थी आणि बाजारपेठेतील नागरिकांना मोठ्या त्रासाला सामोरे जावे लागत आहे.याबाबात भाजप शहर उपाध्यक्ष उमाकांत दाभोळे यांनी मुख्यमंत्री देवेंद्र फडणवीस यांच्याकडे इ-मेल द्वारे तक्रार केली आहे.

या मार्गावरील अपुऱ्या कामामुळे गंभीर अपघात होण्याची शक्यता असून, याबाबत संबंधित अधिकारी आणि ठेकेदारांविरोधात सदोष मनुष्यवधाचा गुन्हा दाखल करावा, अशी मागणी होत आहे. यापूर्वीच नदीवेस नाका येथे रस्त्याच्या कामामुळे अपघात होऊन तिघांनी आपले प्राण गमावले आहेत. त्यामुळे सार्वजनिक बांधकाम विभागाच्या दुर्लक्षामुळे सांगली नाका ते यड्राव फाटा परिसरातही अपघात होण्याचा धोका आहे.

या योजनेंतर्गत सुरू असलेल्या कामांची माहिती दर्शविणारे फलक कोणत्याही ठिकाणी लावण्यात आलेले नाहीत. त्यामुळे जनतेला कोणतीही अधिकृत माहिती मिळत नसल्याची तक्रार आहे.

 दाभोळे यांनी या संदर्भात सार्वजनिक बांधकाम विभागाच्या मुख्य कार्यकारी अभियंत्यांना लेखी तक्रार दिली आहे. तसेच, या गंभीर समस्येकडे शासनाचे लक्ष वेधण्यासाठी मुख्यमंत्री देवेंद्र फडणवीस, आरोग्य मंत्री आणि कोल्हापूर जिल्ह्याचे पालकमंत्री प्रकाश आबिटकर, खासदार धैर्यशील माने, आमदार डॉ. राहुल आवडे, माजी आमदार सुरेश हाळवणकर, तसेच जिल्हाधिकाऱ्यांना प्रतिलिपी पाठवण्यात आली आहे.

जर त्वरित योग्य ती कारवाई न झाल्यास, वडगाव बाजार समिती परिसरातील नागरिकांसह तीव्र आंदोलन छेडले जाईल, असा इशाराही देण्यात आला आहे.