इचलकरंजीत ‘मुख्यमंत्री माझी शाळा सुंदर शाळा’ स्पर्धेचा भव्य गौरव सोहळा — गुणवत्तापूर्ण शिक्षणाचा संकल्प

इचलकरंजी : विद्यार्थ्यांच्या सर्वांगीण प्रगतीसाठी शाळांनी घेतलेल्या प्रयत्नांची दखल घेत राज्य शासनाच्या ‘मुख्यमंत्री माझी, शाळा सुंदर शाळा’ या उपक्रमांतर्गत २०२४-२५ या शैक्षणिक वर्षातील टप्पा-२ मधील विजेत्या शाळांचा गौरव सोहळा श्रीमत नारायणराव घोरपडे नाट्यगृह येथे शनिवारी मोठ्या उत्साहात संपन्न झाला.

जिल्हा परिषद, कोल्हापूर; पंचायत समिती हातकणंगले व इचलकरंजी महानगरपालिका यांच्या संयुक्त विद्यमाने हा कार्यक्रम आयोजित करण्यात आला होता.

या सोहळ्याला खासदार धैर्यशील माने, आमदार डॉ. राहुल आवाडे आणि आमदार डॉ. अशोकराव माने यांची उपस्थिती लाभली. विजेत्या शाळांच्या शिक्षक, मुख्याध्यापक आणि विद्यार्थ्यांना सन्मानचिन्ह देऊन गौरवण्यात आले.

यावेळी आमदार डॉ. राहुल आवाडे म्हणाले, ‘‘मुख्यमंत्री माझी शाळा सुंदर शाळा या योजनेतून शैक्षणिक व भौतिक विकास घडून आला असून, भविष्यात गुणवत्तापूर्ण शिक्षणाचा विस्तार करण्यासाठी शासन कटिबद्ध आहे.’’ त्यांनी शिक्षकांना विद्यार्थ्यांना संशोधक सुभाष खोत व प्रशासकीय अधिकारी विकास खारगे यांच्यासारखे घडवण्याचे आवाहन केले.

खासदार धैर्यशील माने यांनी सांगितले की, ‘‘देशाच्या विकासाचा पाया सरकारी शाळा असून, शिक्षकांनी आपली भूमिका प्रामाणिकपणे बजावल्यास राष्ट्र सशक्त होईल.’

या कार्यक्रमाचे नियोजन प्रशासन अधिकारी इरफान पटेल यांनी केले होते. त्यांच्या नियोजन कौशल्याचे उपस्थित मान्यवरांनी विशेष कौतुक केले.

शासकीय गटात (तालुकास्तर)प्रथम : विद्या मंदिर संभाजीनगर, सावर्डे,द्वितीय : संजीवन विद्या मंदिर, चंदूर,तृतीय : कन्या विद्या मंदिर, रेंदाळ

शासकीय गट (जिल्हास्तर) द्वितीय : कन्या विद्या मंदिर, तारदाळ (केंद्र : आळते)अशासकीय गट (विभागीय निवड)

स्वा.सै.मारुती गणपती पाटील आदर्श विद्यालय व ज्युनिअर कॉलेज, मिणचे.अशासकीय गट (तालुकास्तर)

प्रथम:इचलकरंजी हायस्कूल, इचलकरंजी,द्वितीय : ए.पी. मगदूम हायस्कूल, माणगाव,तृतीय : न्यू इंग्लिश स्कूल, रेंदाळ

या गौरव सोहळ्याला उपायुक्त अशोक कुंभार, गटविकास अधिकारी डॉ. शबाना मोकाशी, तालुका शिक्षण विस्तार अधिकारी नम्रता गुरसाळे, गटशिक्षणाधिकारी रवींद्र चौगले, शिक्षण विस्तार अधिकारी अजय कुमार बिरनगे, शाहनूर कमलशाह यांच्यासह केंद्रप्रमुख, शिक्षक, पालक आणि विद्यार्थी मोठ्या संख्येने उपस्थित होते.

गौरव सोहळा कार्यक्रमात सन्मान करताना खा.धैर्यशील माने,आ.राहुल आवाडे, आ.अशोकराव माने व इतर