पंचगंगा प्रदूषणमुक्तीसाठी ठोस पाऊले उचलण्याची मंत्री पंकजा मुंडे यांची ग्वाही.
इचलकरंजी:
कोल्हापूर जिल्ह्याची जीवनदायीनी असणारी पंचगंगा नदी प्रदुषणमुक्त करण्यासाठी आवश्यक त्या उपाययोजनांची तातडीने अंमलबजावणी, प्रदुषणमुक्तीसाठी आवश्यक निधीची तरतूद आणि प्रदुषणास जबाबदार असणार्‍यांवर कारवाई अशा विविध विषयांवर मंगळवारी पर्यावरण मंत्री पंकजा मुंडे यांच्या उपस्थितीत झालेल्या बैठकीत सकारात्मक चर्चा करण्यात आली. पंचगंगा प्रदुषणमुक्तीसाठी लवकरात लवकर ठोस पावले उचलण्याचा निर्णयही यावेळी झाला.
पंचगंगा नदी प्रदुषणमुक्तीसाठी निधीची तरतूद करणे, पंचगंगा प्रदुषणाच्या निर्मुलनासाठी उपाययोजना करणे, पंचगंगा प्रदुषणमुक्त होऊन स्वच्छ होणेसाठी ठोस निर्णय घेणे आदी संदर्भात मंगळवारी दुपारी राज्याच्या पर्यावरण व वातावरणीय बदल मंत्री पंकजा मुंडे यांच्या दालनात बैठक पार पडली. नुकत्याच झालेल्या अधिवेशनात आमदरा आवाडे यांनी पंचगंगा प्रदुषणाचा मुद्दा उपस्थित करत या संदर्भात तातडीने बैठक घेऊन ठोस उपाययोजना आणि तातडीने अंमलबजावणी करण्याची मागणी केली होती. त्या अनुषंगाने ही बैठक झाली. या बैठकीस आमदार डॉ. राजेंद्र पाटील-यड्रावकर, आमदार राहुल आवाडे, आमदार अमल महाडीक, कोल्हापूरचे जिल्हाधिकारी, आयुक्त, इचलकरंजीच्या आयुक्त पल्लवी पाटील, नगर विकास विभाग, पाणी पुरवठा विभाग व उद्योग-ऊर्जा व कामगार विभागाचे प्रधान सचिव, महाराष्ट्र प्रदुषण नियंत्रण मंडळाचे सदस्य सचिव, महाराष्ट्र औद्योगिक विकास महामंडळाचे मुख्य कार्यकारी अधिकारी, जिल्हा परिषद मुख्य कार्यकारी अधिकारी, पर्यावरण व वातावरणीय बदल विभाग सचिव, प्रधान सचिव (पर्यावरण), महाराष्ट्र प्रदुषण नियंत्रण मंडळाचे प्रादेशिक अधिकारी आदी उपस्थित होते.
यावेळी आमदार राहुल आवाडे यांनी पंचगंगा नदी प्रदुषणाचा प्रश्‍न सातत्याने गंभीर बनत चालला आहे. वस्त्रनगरीसह नदीकाठावरील गावांना या प्रदुषणाचा फटका बसत आहे. पाणी पिण्यायोग्य असतानाही केवळ प्रदुषणामुळे त्याचा वापर करता येत नाही. हे सर्व रोखण्यासाठी पंचगंगा नदी तातडीने प्रदुषणमुक्त होण्यासाठी आवश्यक त्या उपाययोजनांची ठोसपणे अंमलबजावणी होणे गरजेचे असल्याचे सांगितले. या संदर्भात पर्यावरण मंत्री पंकजा मुंडे यांनी उपस्थितांचे म्हणणे ऐकून घेत संबंधित विभागाच्या अधिकार्‍यांकडून माहिती जाणून घेत पंचगंगा प्रदुषणमुक्तीसाठी लवकरात लवकर आवश्यक त्या उपाययोजना करण्यासह आवश्यक त्या निधीची उपलब्धता करुन देण्याबाबत सकारत्मकता दर्शवत लवकरात लवकर प्रदुषणमुक्तीसाठी ठोस उपाययोजना करण्याची ग्वाही दिली.
पंचगंगा प्रदूषणमुक्ती संदर्भात बैठकीत मंत्री पंकजा मुंडे,आ.डॉ. राजेंद्र पाटील-यड्रावकर, आ.राहुल आवाडे, आ.अमल महाडीक, कोल्हापूरचे जिल्हाधिकारी, आयुक्त, इचलकरंजीच्या आयुक्त पल्लवी पाटील
Author: ICHMH51 NEWS ABHIJIT PATWA
घडामोडी वस्त्रनगरीच्या... इचलकरंजी शहरातील चालू घडामोडी, ब्रेकिंग न्यूज आपल्याला समजाव्यात यासाठी हे पोर्टल सुरू केले असून नागरी समस्यांना वाचा फोडून त्या मार्गी लावण्यासाठी आम्ही प्रयत्नशील आहोत. अधिक माहिती,बातम्या व जाहिरातीसाठी संपर्क- अभिजित राजेंद्र पटवा,इचलकरंजी. 9921600800
