महापालिकेतील फोटो वादावर पडदा; महायुतीतील समन्वयानंतर प्रतिमा पुन्हा स्थायी समिती दालनात

इचलकरंजी :

 इचलकरंजी महानगरपालिकेच्या स्थायी समिती दालनातील उपमुख्यमंत्री एकनाथ शिंदे, उपमुख्यमंत्री सुनेत्रा पवार आणि खासदार धैर्यशील माने यांच्या प्रतिमा हटविणे आणि पुन्हा लावणे या मुद्द्यावरून निर्माण झालेल्या राजकीय वादावर अखेर पडदा पडला आहे. वरिष्ठ पातळीवरील चर्चेनंतर संबंधित नेत्यांच्या प्रतिमा पुन्हा दालनात लावण्यात आल्याने महायुतीतील तणाव निवळल्याचे चित्र दिसत आहे.

महापालिकेच्या स्थायी समिती सभागृहात सुमारे दोन महिन्यांपूर्वी सभापती सतीश मुळीक यांनी उपमुख्यमंत्री एकनाथ शिंदे, उपमुख्यमंत्री सुनेत्रा पवार आणि खासदार धैर्यशील माने यांच्या प्रतिमा लावल्या होत्या. मात्र, काही दिवसांपूर्वी सोशल मीडियावर या प्रतिमा शिवसेना शिंदे गटाच्या दबावामुळे लावण्यात आल्याचा दावा करणारे संदेश व्हायरल झाले. या घडामोडींनंतर संबंधित प्रतिमा दालनातून हटविण्यात आल्या आणि त्यावरून नवीन वादाला तोंड फुटले.

दरम्यान, या प्रकरणी प्रशासनाकडून स्पष्ट भूमिका समोर आली नसल्याने महायुतीतील अंतर्गत मतभेदांची चर्चा रंगू लागली होती.

या पार्श्वभूमीवर खासदार धैर्यशील माने, आमदार राहुल आवाडे यांच्यात चर्चा झाल्यानंतर सर्व संबंधित नेत्यांच्या प्रतिमा पुन्हा स्थायी समिती दालनात लावण्यात आल्या.

“महायुती धर्म पाळत आम्ही प्रतिमा लावल्या असताना दणक्याची भाषा करणे योग्य नाही. महायुती ही सर्वांची असून ती टिकविण्याची जबाबदारी प्रत्येक घटक पक्षाची आहे,” असे धातूंडे यांनी स्पष्ट केले.

“महायुतीमध्ये सर्व काही सुरळीत सुरू असताना सोशल मीडियावर चुकीचा संदेश व्हायरल झाला. त्याला प्रत्युत्तर म्हणून काही काळ प्रतिमा हटविण्यात आल्या होत्या. मात्र, याचा कोणत्याही नेत्याबद्दल अनादर करण्याचा हेतू नव्हता. महायुतीत बेबनाव निर्माण करण्याचा केविलवाणा प्रयत्न कोणीही करू नये,” असे मुळीक यांनी म्हटले. यावेळी उपमहापौर अनिल डाळ्या, गटनेते विठ्ठल चोपडे, नगरसेवक रवी रजपूते,राजु बोंद्रे योगेश पाटील यांच्यासह पदाधिकारी उपस्थित होते.

महापौर उदय धातूंडेना फोटो लावण्याचे निवेदन देताना जिल्हाप्रमुख रविंद्र माने,भाऊसो आवळे व पदाधिकारी

पत्रकार परिषदेत भुमिका मांडताना महापौर उदय धातूंडे,स्थायी समिती सभापती सतीश मुळीक,उपमहापौर अनिल डाळ्या,गटनेते विठ्ठल चोपडे