कन्या महाविद्यालयाचे राष्ट्रीय सेवा योजना विशेष श्रमसंस्कार शिबीर संपन्न.

इचलकरंजी:

येथील श्री स्वामी विवेकानंद शिक्षण संस्था कोल्हापूर संचलित,श्रीमती आक्काताई रामगोंडा पाटील कन्या महाविद्यालय राष्ट्रीय सेवा योजना विभागामार्फत विशेष श्रमसंस्कार शिबिर दि 24 ते 30 जानेवारी 2025 दरम्यान मौजे चंदुर येथे आयोजित करण्यात आले.

या श्रमसंस्कार शिबिराच्या समारोप प्रसंगी दत्ताजीराव कदम आर्ट्स,सायन्स अँड कॉमर्स महाविद्यालय इचलकरंजीचे प्राचार्य डॉ.एस एम मणेर प्रमुख पाहुणे म्हणून उपस्थित होते.याप्रसंगी ते म्हणाले,विद्यार्थ्यांमध्ये आत्मविश्वास महत्त्वाचा असतो, राष्ट्रीय सेवा योजना विभागामार्फत व्यक्तिमत्व विकास घडत असतो तसेच शून्यातून विश्व निर्माण करण्याचे सामर्थ्य या शिबिरांमधून विद्यार्थ्यांच्या अंगी रुजत असते.उद्याचे राष्ट्र घडवायचे असेल तर विद्यार्थ्यांनी समाजामध्ये कसे वावरायचे, समाजाबरोबर नाते कसे दृढ करायचे याविषयीचे ज्ञान अशा शिबिरांमधूनच विद्यार्थ्यांपर्यंत पोहोचत असते.

कार्यक्रमाच्या अध्यक्षस्थानी महाविद्यालयाचे प्राचार्य डॉ. बाबासाहेब दुधाळे हे होते. याप्रसंगी ते म्हणाले,विद्यार्थी जर सक्षम घडायचा असेल तर राष्ट्रीय सेवा योजना अत्यंत महत्त्वाची आहे. समाजाप्रती आपण काही देणे लागतो याची जाणीव होण्यासाठी अशा श्रमसंस्कार शिबिरांचे आयोजन केले जाते. यामध्ये सहभाग घेतल्याने आपल्यामध्ये अनेक कला गुण असतात याची प्रचिती विद्यार्थ्यांना होत असते. विद्यार्थ्यांनी स्वतःला ओळखायला शिकले पाहिजे असे मत त्यांनी मांडले.राष्ट्रीय सेवा योजना विभागाच्या स्वयंसेविकांनी आपले प्रातिनिधीक मनोगते व्यक्त केली. याप्रसंगी चंदुर गावच्या लोकनियुक्त सरपंच सौ स्नेहल कांबळे तसेच उपसरपंच सौ योगिता हळदे उपस्थित होत्या.तसेच हातकणंगले पंचायत समितीचे मा.सभापती मा महेश पाटील,माजी उपसरपंच संजय जिंदे सचिन कांबळे,भाऊसो रेंदाळे,बाबासो मंगसुळे आदी ग्रामपंचायत सदस्य उपस्थित होते.कार्यक्रमाचे प्रास्ताविक व अहवाल वाचन डॉ.धीरज शिंदे यांनी केले.पाहुण्यांची ओळख डॉ प्रियांका कुंभार यांनी केली.या प्रसंगी  महाविद्यालयातील प्रा.सोमनाथ गायकवाड प्रा.उदय कांबळे,प्रा.स्वाती हळवणकर,प्रा.शुभांगी नाकील,प्रा.निकिता बडे तसेच महाविद्यालयातील कर्मचारी उपस्थित होते.

कार्यक्रमाचे आभार कु दिव्या बिरांजे या विद्यार्थिनीने मांडले तर सूत्रसंचालन प्रा संदीप पाटील यांनी केले.