कार जाळल्याची घटना: तिघांवर शहापूर पोलिस ठाण्यात गुन्हा दाखल

इचलकरंजी,

शुक्रवारी यड्राव येथे एका व्यक्तीच्या घरासमोरील पार्किंगमध्ये उभी असलेली कार अज्ञात कारणावरून पेटवून देण्याचा धक्कादायक प्रकार घडला आहे. या प्रकरणी शहापूर पोलिस ठाण्यात तीन जणांविरोधात गुन्हा दाखल करण्यात आला आहे.

फिर्यादी हरिश रामचंद्र नाईक (वय ३६, व्यवसाय – केबल, रा. यड्राव, ता. शिरोळ, जि. कोल्हापूर) यांनी दिलेल्या तक्रारीनुसार,१२ फेब्रुवारी रोजी पहाटे ३.४५ वाजण्याच्या सुमारास त्यांचे घराचे गेट ओलांडून आरोपींनी पार्किंगमध्ये प्रवेश केला. त्यानंतर त्यांच्या मालकीच्या होंडा अमेझ (MH 09 DM 9313) या कारला जाळून अंदाजे दोन लाख रुपयांचे नुकसान केले.

या प्रकरणी सार्थक वडे (रा. गोविंदराव कॉलेज जवळ, इचलकरंजी), आदित्य भस्मे (रा. सुतारमळा, इचलकरंजी) आणि उमेश धुमाळ (रा. आरके नगर, शहापूर) यांच्याविरुद्ध गुन्हा दाखल करण्यात आला आहे.

घटनेची माहिती मिळताच पोलीस निरीक्षक सचिन सूर्यवंशी यांनी घटनास्थळी भेट दिली. या प्रकरणाचा पुढील तपास पोलीस उपनिरीक्षक कुटे यांच्या मार्गदर्शनाखाली सुरू आहे.