इचलकरंजीत दारू पिण्यावरून वाद –साथीदाराचा गळ्यावर चाकूने हल्ला

इचलकरंजीत दारू पिण्यावरून वाद – साथीदाराचा गळ्यावर चाकूने हल्ला

इचलकरंजी: दारू पिण्यावरून झालेल्या वादातून एका तरुणावर त्याच्या साथीदारानेच भाजी कापण्याच्या चाकूने हल्ला केला. या हल्ल्यात तरुण गंभीर जखमी झाला असून त्याच्यावर उपचार सुरू आहेत. ही घटना शुक्रवारी सायंकाळी गांधी पुतळा, हनुमान मंदिर शेजारी घडली.

या प्रकरणी इचलकरंजी पोलीस ठाण्यात आरोपी राजाकुमार याच्यावर गुन्हा दाखल करण्यात आला आहे.

फिर्यादी सलमान वजीर अन्सारी (वय २७, सध्या रा. गांधी पुतळा, हनुमान मंदिर जवळ, इचलकरंजी, मुळगाव – बिहार) आणि आरोपी  राजाकुमार भगवान महातो रा. इचलकरंजी हे दोघे एकाच खोलीत राहात होते. घटनेच्या दिवशी सकाळी दोघांनी एकत्र बसून दारू सेवन केली. त्यानंतर फिर्यादी झोपले असता दुपारी साडेचारच्या सुमारास आरोपीने पुन्हा दारू पिण्यास सांगितले. मात्र, फिर्यादीने नकार दिल्याने आरोपीने शिवीगाळ केली आणि मारहाण सुरू केली.वाद वाढल्यानंतर रूममध्ये असलेल्या भाजी कापण्याच्या स्टीलच्या चाकूने आरोपीने फिर्यादीच्या गळ्यावर वार केला. यात फिर्यादी गंभीर जखमी झाले असून त्यांना तातडीने आयजीएम हॉस्पिटलमध्ये दाखल करण्यात आले आहे.आरोपी पळून जाण्याचा प्रयत्नात असताना त्याला ताब्यात घेण्यात आले आहे.घटनेची माहिती मिळताच उपविभागीय पोलीस अधिकारी समीरसिंह साळवे, पोलीस निरीक्षक महेश चव्हाण आणि सपोनि विजय गोडसे यांनी घटनास्थळी भेट देऊन पाहणी केली.पोलीस हवालदार महाबरी यांनी गुन्हा दाखल केला असून, पोलीस उपनिरीक्षक जी. एन. कोळेकर तपास करत आहेत.