फेब्रुवारीच्या मासिक गुणांकनात आयजीएमची चतुर्थस्थानी झेप.
इचलकरंजी:
येथील इंदिरा गांधी सामान्य रुग्णालयाने राज्य शासनाच्या आरोग्य सेवा संचालनालयामार्फत जाहीर केलेल्या फेब्रुवारीच्या मासिक गुणांकणात राज्यात चौथा क्रमांक मिळवला आहे. या कामगिरीमुळे आयजीएम रुग्णालयाच्या चांगल्या आरोग्य सेवेवर शिक्कामोर्तब झाले आहे.
आरोग्य सेवा संचालक, आयुक्तालय, मुंबई यांच्या मार्गदर्शनाखाली ही मासिक गुणांकन प्रणाली जिल्हा, सामान्य व उपजिल्हा रुग्णालयांसाठी लागू केली आहे. रुग्णालयांची ही रँकिंग प्रक्रिया रुग्णसेवा,स्वच्छता,योग्य वेळेत उपचार,तपासणी व्यवस्था तसेच राष्ट्रीय आरोग्य कार्यक्रमातील अंमलबजावणी यांसारख्या स्तरावरील कामगिरीवर आधारित आहे. रँकिंगमध्ये आयजीएम रुग्णालयाने एकूण ६७ गुण प्राप्त करून चौथ्या क्रमांकावर स्थान मिळवले आहे.
सातत्याने रुग्णसेवेतील सुधारणा, कर्मचाऱ्यांची मेहनत,तसेच प्रशासनाचे कार्यक्षम नियोजन यामुळे हे यश मिळवता आल्याचे रुग्णालय प्रशासनाकडून सांगण्यात आले. रुग्णालयाच्या यशाबद्दल शहरात आणि परिसरात समाधान व्यक्त करण्यात येत आहे. दरम्यान आयजीएम रुग्णालयाच्या अधीक्षक डॉ. भाग्यरेखा पाटील व अमित सोहनी यांनी संपूर्ण स्टाफने रुग्णांना योग्य सेवा देऊन आपली गुणवत्ता सिद्ध केली आहे असे मत व्यक्त केले.
आकृतीबंधप्रमाणे रिक्त पदभरती आवश्यक-
कमी डॉक्टर असताना रुग्णालयाने प्रगती केली आहे, रुग्णांना अधिक सेवा देण्यासाठी अजून भूलतज्ञ,अपघात विभागातील डॉक्टर,अस्थिरोग तज्ज्ञांची आवश्यकता आहे,याची उपलब्धता तातडीने झाल्यास गुणांकणात ही सुधारणा होईल व रुग्णांना सोयीही मिळतील.
