राज्यात ‘जिवंत सातबारा’ मोहिमेला सुरुवात,मृत खातेदारांच्या वारसांची नोंद ७/१२ उताऱ्यावर होणार, शेतकऱ्यांना दिलासा- प्रांताधिकारी मोसमी चौगुले
इचलकरंजी:
राज्य सरकारच्या १०० दिवस कृती आराखड्यांतर्गत महसूल विभागाने “जिवंत सातबारा” ही महत्त्वाकांक्षी मोहिम राबवण्याचे निर्देश दिले आहेत. या मोहिमेअंतर्गत गावातील सर्व मृत खातेदारांच्या वारसांची नोंद ७/१२ उताऱ्यावर करण्यात येणार असून,यामुळे शेतकऱ्यांना व नागरिकांना जमिनीशी संबंधित व्यवहार करताना मोठा दिलासा मिळणार असल्याची माहिती प्रांताधिकारी मोसमी चौगुले यांनी पत्रकार परिषदेत दिली.
राज्य शासनाच्या निर्देशानुसार मोहिम १ एप्रिलपासून जिल्ह्यातील सर्व तालुक्यांमध्ये सुरू झाली आहे.
१ एप्रिल ते ५ एप्रिल तलाठ्यांनी चावडी वाचन करून गावनिहाय मृत खातेदारांची यादी तयार करण्यात आली आहे.६ एप्रिल ते २० एप्रिल संबंधित वारसांनी मृत्यूदाखला, प्रतिज्ञापत्र,पोलिस पाटील अथवा सरपंचाचा दाखला व सर्व वारसांची माहिती तलाठ्यांकडे सादर करायची आहे.
२१ एप्रिल ते १० मे पर्यत ई-फेरफार प्रणालीद्वारे वारस नोंदी तयार करून, मंडळ अधिकाऱ्यांनी फेरफार मंजूर करून ७/१२ उताऱ्यावर आवश्यक सुधारणा करण्यात येणार आहेत.
महसूल मंत्री यांच्या निर्देशानुसार संपूर्ण राज्यभर ही मोहिम एकाचवेळी राबवली जाणार आहे. वारस नोंदी वेळेत न झाल्याने शेतकऱ्यांना अनेक अडचणींना सामोरे जावे लागत असल्याने, ही मोहिम नागरिकांना मोठा दिलासा देणारी ठरणार आहे.
या मोहिमेमुळे महसूल अभिलेख पारदर्शक व अद्ययावत होतील. वारसांची अधिकृत नोंद झाल्याने वारसांना शेतीच्या व्यवहारात,बँक कर्ज प्रक्रियेत व विविध सरकारी योजनांमध्ये अडचण येणार नाही. जिल्हा प्रशासनाने सर्व नागरिकांना सहकार्य करण्याचे आवाहन केले असून, वेळेत आवश्यक कागदपत्रे सादर करून मोहिम यशस्वी करावी असे आवाहन करण्यात आले आहे.
