जिल्हा कबड्डी असोसिएशनचे पंच चर्चासत्र संपन्न

इचलकरंजी :

कोल्हापूर जिल्हा कबड्डी असोसिएशनच्या पंचमंडळाचे एक दिवसीय चर्चासत्र डी. के. टी. ई. संस्था, राजवाडा येथे पार पडले. डायनॅमिक स्पोर्ट्स, इचलकरंजी व डी. के. टी. ई. इचलकरंजी यांच्या संयुक्त विद्यमाने हे चर्चासत्र आयोजित केले गेले होते.

या समारंभाचे उद्घाटन मा. जिल्हा परिषद सदस्य व इचलकरंजीचे युवा नेतृत्व डॉ. श्री राहुल आवाडे यांनी केले.

अध्यक्षस्थानी कोल्हापूर जिल्हा कबड्डी असोसिएशनचे कार्याध्यक्ष प्रा. श्री रमेश भेंडीगिरी हे होते.

प्रारंभी उपस्थितांचे स्वागत व कार्यक्रमाचे प्रास्ताविक डायनॅमिक स्पोर्ट्सचे कार्यवाह व डी. के. टी. ई. संस्थेचे विश्वस्त प्रा. श्री शेखर शहा यांनी केले. पंच चर्चासत्रासाठी उपस्थित सर्वांचे स्वागत करून शेखर शहा यांनी असोसिएशनने दिलेली कोणतीही जबाबदारी आम्ही उत्कृष्टपणे पार पाडू असे आश्वासन दिले. इचलकरंजीमध्ये कबड्डीची एखादी राष्ट्रीय स्पर्धा आयोजित करावी अशी मा. खा. श्री कल्लाप्पाण्णा आवाडे यांची इच्छा असून, तशी संधी असोसिएशनने द्यावी अशी मागणी त्यांनी केली.

याप्रसंगी उपस्थित सर्व मान्यवरांचे बुके देऊन स्वागत करण्यात आले.

मा. डॉ. श्री राहुल आवाडे यांनी आपल्या मनोगतात इचलकरंजीच्या क्रीडा संस्कृतीचा आढावा घेतला. सहकार महर्षी ज्येष्ठ नेते मा. खा. श्री कल्लाप्पाण्णा आवाडे साहेब यांनी इचलकरंजीच्या क्रीडा संस्कृतीसाठी दिलेल्या योगदानाचा त्यांनी उल्लेख केला. वस्त्रनगरी इचलकरंजीची ओळख क्रीडानगरी इचलकरंजी म्हणून बनविण्यासाठी आवश्यक त्या साऱ्या गोष्टींची पूर्तता येत्या पाच वर्षात केली जाईल असेही त्यांनी पुढे नमूद केले. कोल्हापूर कबड्डी असोसिएशनशी सातत्याने संपर्कात असून भविष्यात असोसिएशनला आवश्यक ते सर्व सहकार्य करू असेही ते म्हणाले. आपल्या अध्यक्षीय भाषणात श्री रमेश भेंडगिरी यांनी पंच हे कोणत्याही खेळामध्ये महत्त्वाची भूमिका बजावणारे असतात आणि याच कारणाने आज पंचांची कार्यशाळा आयोजित केली असल्याचे सांगितले. पुढील चर्चासत्रांमध्ये पंचांबरोबर प्रत्येक मंडळाचे क्रीडा प्रशिक्षक तसेच संस्थेचे सदस्य यांचा समावेश करून सर्वसमावेशक चर्चासत्र आयोजित करून कबड्डी विषयक सर्व प्रश्नांची सोडवणूक करण्याचा आमचा प्रयत्न राहील असे त्यांनी सांगितले.

चर्चासत्रामध्ये कबड्डी खेळातील पंचांची भूमिका आणि त्या संबंधाने विविध मुद्द्यांवर मान्यवरांनी मार्गदर्शन केले.

 त्यामध्ये असोसिएशनचे खजिनदार प्रा. श्री अण्णासो गावडे, जॉईंट सेक्रेटरी प्रा. श्री विलास खानविलकर, पंच मंडळाचे सदस्य प्रा. श्री बाबासाहेब उलपे, उपाध्यक्ष श्री अजित पाटील, पंच श्री रुपेश जाधव यांचा समावेश होता.

यावेळी जिल्हा कबड्डी असोसिएशनचे उपाध्यक्ष श्री भगवानराव पवार, उपाध्यक्ष श्री दत्तामामा खराडे, जॉईंट सेक्रेटरी श्री उदय चव्हाण हे मान्यवर उपस्थित होते.

यावेळी उपस्थित पंचांनी पंचगिरी करताना येणाऱ्या विविध अडचणी व समस्या मांडल्या. पंचांच्या विविध प्रश्नांवर उपस्थित मान्यवर व पदाधिकारी यांच्यात सविस्तर चर्चा होऊन अनेक समस्यांवर मार्ग कसे काढायचे यावर उपाय ठरविले गेले. एकंदरीत कबड्डी खेळाला प्रो कबड्डीच्या माध्यमातून सोनेरी दिवस आलेले असतानाच, हा खेळ ऑलिंपिक सारख्या पातळीवर पोहोचावा यादृष्टीने भारतासह विविध देशात प्रयत्न चालू आहेत. अशावेळी कबड्डीचे सामर्थ्यस्थान असणाऱ्या कोल्हापूर जिल्हा कबड्डी असोसिएशनने हा उपक्रम राबविल्याबद्दल कबड्डीप्रेमींच्यामधून समाधान व्यक्त करण्यात येत आहे. कार्यक्रमाचे सूत्रसंचालन क्रीडा शिक्षक डॉ. राहुल कुलकर्णी यांनी केले तर आभार प्रा. श्री अण्णासाहेब गावडे यांनी मानले.

चर्चा सत्रासाठी उपस्थित पंच व मान्यवर यांच्यामध्ये संजय कुडचे, अतुल बुगड, शंकर पोवार, विजय गुरव, शरद तावदारे, बाळासाहेब चव्हाण, कार्तिक बचाटे, बाळू बनगे, शहाजहान शेख, आशिष मगदूम, कुबेर पाटील, ओंकार खानाज, वासीम बागवान, मोहिते सर, सोनल बाबर यांच्यासह जिल्ह्यातील कबड्डी असोसिएशनचे पंच, महिला पदाधिकारी इत्यादींचा समावेश होता.