अखेर इचलकरंजी महापालिकेने दिला कचरा उठाव ठेका,मुदतवाढीचा खेळ बंद

इचलकरंजी, ता.१५ ः इचलकरंजी महापालिकेने शहरातील कचरा उठाव व वाहतूक करण्याच्या कामाची निविदा प्रक्रिया अखेर पूर्ण केली आहे.आता पुढील दोन वर्षे शहरातील स्वच्छतेची जबाबदारी फलटणच्या नामांकित कंपनीवर सोपविण्यात आली आहे.त्यामुळे गेल्या काही महिन्यांपासून विस्कळीत झालेला कचरा उठावाचा प्रश्न व अस्वच्छतेचा प्रश्न लवकरच मार्गी लागणार आहे.

शहरात दररोज १०० टनापेक्षा जास्त कचरा निर्माण होतो. यामध्ये शहरातील रस्ते व गटारींची स्वच्छता महापालिकेकडील स्वच्छता कर्मचारी करतात.तर घंटागाडीच्या माध्यमातून घरोघरी जावून कचरा संकलन करण्यासह कचरा उठाव व वाहतूकीचे काम ठेकेदारीने खासगी कंपनीकडे दिले आहे.गेल्या चार वर्षापासून हे काम आदर्श फॅसिलिटी या औरंगाबाद येथील एका कंपनीकडे होते.नविन टेंडर प्रक्रियेत अडचणी निर्माण झाल्याने त्यांना सतत मुदत वाढ देण्यात येत होती. अलीकडे या कंपनीच्या कामात विस्कळीतपणा आला होता व नागरिकांच्या तक्रारी प्राप्त होत होत्या.महापालिकेने काही वेळा दंडात्मक कारवाई केली होती.

आता राबवलेल्या निविदा प्रक्रियेत  चार मक्तेदार कंपन्या सहभागी झाल्या.त्यातील दोन मक्तेदार कंपन्या पात्र ठरल्या.यापैकी एनडीके हाॅस्पिटॅलिटी एलएलपी, फलटण (जि. सातारा) या कंपनीची अंदाजपत्रकीय रकमेपेक्षा ०.६३ टक्के कमी निविदा मंजूर करण्यात आली. या कंपनीकडे २ दिवसांपूर्वी कार्यादेश देण्यात आल्याने कंपनीने काम सुरू केले आहे.

पुढील दोन वर्षे याच कंपनीकडे हे काम असणार असल्याचे आरोग्य अधिकारी डाॅ. सुनिलदत्त संगेवार यांनी स्पष्ट केले.