हिंदुराव शेळकेंची बंडखोरी,भाजपला रामराम करत निवडणुक लढवण्याची घोषणा.

भाजपचे ज्येष्ठ नेते माजी जिल्हाध्यक्ष हिंदुराव शेळके यांनी।भारतीय जनता पक्षाला रामराम करत अपक्ष निवडणूक लढवणार असल्याची घोषणा केली.याबाबत अधिक माहिती देताना त्यांनी माझ्याकडे सर्व पर्याय खुले असून कोणत्याही परिस्थितीत निवडणूक लढवणार असल्याचे पत्रकार परिषदेत सांगितले.

भारतीय जनता पार्टीने आवाडे घराण्यात विधानसभेची उमेदवारी देण्याचे ठरवल्याने कार्यकर्त्यांचा सन्मान जपण्यासाठी निर्णय घेतल्याचे त्यांनी सांगितले. इचलकरंजीच्या विकासासाठी प्रयत्नशील असुन आपण भारतीय जनता पार्टी वाढवण्यासाठी गावोगावी प्रयत्न केले. इचलकरंजी विधानसभेत दोन वेळा आमदार निवडून दिले. कोल्हापूर जिल्हयात प्रथमच विधानसभेत भाजपचे कमळ फुलले मात्र प्रदेश भाजपाने निष्ठावंत कार्यकर्त्याला डावलून ज्याच्याशी संघर्ष केला अशा आवाडे घराण्यात उमेदवारी देण्याचे ठरविल्याने भाजपा कार्यकर्त्याना पक्षाची भूमिका रुचलेली नाही. भाजपा ग्रामीण जिल्हा अध्यक्ष असताना चंदगड पासून शिरोळ पर्यंत तसेच कागलपासून हातकणंगले पर्यंत गावोगावी जाऊन पक्ष शाखा स्थापन केली व पक्षाची ध्येय धोरणे पोचवण्याचा प्रयत्न केला.

सन २००४ साली भारतीय जनता पक्षाने माझी उमेदवारी जाहीर केली त्यावेळी तत्कालीन उमेदवार प्रकाश आवाडे यांनी सत्तेच्या बळावर माझा उमेदवारी अर्ज छाननी मध्ये वाद केला. त्याचप्रमाणे २००९ साली इचलकरंजीतील दंगलीमध्ये जाणून बुजून बळाचा वापर करून माझ्यावर व माझ्या सहकाऱ्याना मारहाण केली.

इचलकरंजी मतदार संघात भाजपा पक्ष मजबूत करण्याचे काम करणारे भाजपा प्रदेश उपाध्यक्ष माजी आमदार सुरेशराव हाळवणकर हे सक्षम उमेदवार असताना तसेच पक्षातील माझ्यासह अलका स्वामी, सुनिल महाजन,तानाजी पोवार या सारख्या अनेक नेतेमंडळी विधानसभेसाठी इच्छुक असताना आयात उमेदवार आम्हास मान्य नाही.

मी नगरसेवक व नगराध्यक्ष असताना इचलकरंजी परिसरात केलेल्या कामामुळे येणाऱ्या निवडणूकीत मतदार माझ्या पाठीशी राहील. स्व. बाळासाहेब माने यांचा विचाराचा वारसा घेत गेली अनेक वर्ष स्वाभिमानाने सामाजिक राजकीय कार्यात सहभाग घेतला आहे.मतदार संघातील लोक आवाडे व त्यांच्या घराणेशाहीला कंटाळले असून सक्षम पर्याय शोधत आहेत तो आपण निश्चित देऊ.इचलकरंजी विधानसभा मतदार संघात तारदाळ, खोतवाडी,कोरोची,शहापूर,कबनूर, चंदूर इ. परिसरात आपल्याला मानणारे कार्यकर्ते मोठ्या संख्येने असल्याने या स्वाभिमानी कार्यकर्त्याच्या जोरावर येणारी इचलकरंजी विधानसभा निवडणूक आपण अपक्ष म्हणून लढणारच असा ठाम निर्णय त्यांनी पत्रकार परिषेदत व्यक्त केला. यावेळी तमन्ना कोटगी,अतुल शेळके,विकास शेळके,अमोल शेळके यांच्यासह कार्यकर्ते उपस्थित होते.