सायझिंग असोसिएशनची दरवाढ यंत्रमागधारकांनी नाकारावी-पॉवरलूम असोसिएशन

इचलकरंजी

दि इचलकरंजी सायझींग असोसिएशनने सायझींगच्या दरात दरवाढ व वेगवेगळे विभाग केलेचे तसेच कांही नविन नियम व अटी यंत्रमागधारकांवर लादलेचे दि इचलकरंजी पॉवरलुम असोसिएशनला समाज माध्यमातून समजले आहे. याबाबत दि इचलकरंजी सायझींग असोसिएशनने प्रमुख यंत्रमागधारक संघटना तसेच दि इचलकरंजी पॉवरलुम असोसिएशनशी कोणताही पत्रव्यवहार किंवा बोलणे केलेले नाही. यामुळे अशी कांही दरवाढ किंवा नविन नियम अटींची मागणी परस्पर कारखानदारांकडे होत असलेस ती यंत्रमागधारकांनी, ट्रेडिंगधारकांनी नाकारावी.

वस्त्रोद्योग अत्यंत खडतर व अडचणीच्या परिस्थितीतून मार्गक्रमण करीत असताना अशी सायझींग मजुरूची दरवाढ करणे यंत्रमाग उद्योगामध्ये अस्थिरता निर्माण करणारी आहे. सध्या कापडाला मागणी नाही. जगात युद्ध परिस्थिती असलेमुळे निर्यात पूर्णपणे बंद आहे. अशावेळी सायझींग दरातील वाढ या उद्योगास आणखीन अडचणीची ठरणार आहे. सध्या आहे त्या सायझींग दरापेक्षा कमी दरात सायझींगची मजूरी सुरू असताना दरात वाढ करणे कितपत साध्य होणार आहे याचे दि इचलकरंजी सायझींग असोसिएशनने परिक्षण करणे गरजेचे आहे. कोणत्याही सक्तीच्या दरवाढीची घोषणा किंवा नविन नियम व अटी यांना मंजूरी दिली गेलेली नाही. त्यामुळे कारखानदारांनी सायझींग दरामध्ये कोणत्याही प्रकारची दरवाढ देऊ नये तसेच कोणत्याही प्रकारचे नविन नियम व अटी स्विकारू नये असे आवाहन दि इचलकरंजी पॉवरलुम असोसिएशनचे अध्यक्ष चंद्रकांत पाटील यांनी केले आहे.