हटकर कोष्टी समाजाचा रविवारी ३१ वा वधू-वर परिचय मेळावा
प्रतिनिधी
इचलकरंजी
हटकर कोष्टी समाजाच्या वतीने ३१ वा वधू-वर परिचय मेळावा रविवार, २२ डिसेंबर २०२४ रोजी मराठा मंडळ सांस्कृतिक भवन येथे आयोजित करण्यात आला आहे. हा मेळावा सकाळी ९ वाजता सुरू होऊन दुपारी ४ वाजेपर्यंत चालणार आहे. या मेळाव्याची माहिती युवक अध्यक्ष अमित खानाज, मेळावा प्रमुख पवन तेलसिंगे, सहप्रमुख विजय गदाळे यांनी दिली.
ते म्हणाले, गेल्या ३० वर्षांपासून हटकर कोष्टी समाज शहरात अशा प्रकारचे मेळावे यशस्वीरित्या आयोजित करत आहे. यंदाही हा मेळावा मोठ्या उत्साहात होणार असून महाराष्ट्र, कर्नाटक, तेलंगणा, आंध्र प्रदेश, मध्य प्रदेश व गुजरात या राज्यांमधील उपवर व वधू यात सहभागी होणार आहेत.
मेळाव्यात एलईडी स्क्रीनच्या सहाय्याने वधू-वरांची माहिती सादर केली जाणार आहे. तसेच वधू-वरांसाठी स्वतंत्र बैठक व्यवस्थाही करण्यात आली आहे. विशेष म्हणजे, यावेळी अल्पशिक्षित वधुंसाठी मोफत नोंदणीची सुविधा उपलब्ध करून देण्यात आली आहे.
कार्यक्रमाच्या अध्यक्षस्थानी समाजाचे अध्यक्ष शिवकांत मेत्री असतील, तर प्रमुख पाहुणे म्हणून आमदार राहुल आवाडे यांची उपस्थिती असेल. याशिवाय राज्याध्यक्ष डॉ. नंदकुमार वसवाडे, जिल्हाध्यक्ष इराण्णा सिंहासने, श्री बनशंकरी ट्रस्टचे अध्यक्ष अमित कबाडे, महिला मंडळ अध्यक्षा सौ. शैलजा कस्तुरे व इतर मान्यवरही या मेळाव्याला हजेरी लावणार आहेत.
उपवधू व वरांसाठी नोंदणी सकाळी ९ वाजल्यापासून सुरू होईल. इच्छुकांनी व त्यांच्या पालकांनी या संधीचा लाभ घ्यावा, असे आवाहन आयोजकांनी केले आहे. समाजातील ज्येष्ठ मंडळ, युवक मंडळ संचालक, महिला मंडळ सदस्या व विविध कार्यकारिणी सदस्यांनी या मेळाव्याच्या आयोजनात सहभाग घेतला आहे.
हटकर कोष्टी समाजाचा हा मेळावा वधू-वरांसाठी एक महत्त्वपूर्ण मंच ठरणार असून समाजातील विवाह जुळणीसाठी उपयुक्त ठरेल, असा विश्वास आयोजकांनी व्यक्त केला आहे.
