महिला संगीत नाटक ‘गुरुदक्षिणा’चे उत्तम सादरीकरण… उत्स्फूर्त प्रतिसाद

इचलकरंजी:

प्रतिभावंत साहित्यिक आणि चतुरस्त्र व्यक्तिमत्त्व असलेले प्रल्हाद केशव अत्रे यांनी लिहिलेले ‘गुरु दक्षिणा’ हे संगीत नाटक गोवा येथील १८ युवती व महिला कलाकारांनी उत्तम प्रकारे सादर करून सर्व रसिकांची उत्स्फूर्त दाद घेतली. कला व सांस्कृतिक संचालनालय गोवा सरकार आणि येथील आम्ही रसिक मनोरंजन मंडळ व आम्ही कलाकार इचलकरंजी या संस्थांच्या वतीने हा नाट्य प्रयोग आयोजित करण्यात आला.

विमलानंद कला मंच, मडकई – गोवा या संस्थेच्या वतीने सदरचे संगीत नाटक सादर करण्यात आले. संदीप दयानंद फडते यांनी या नाटकाचे दिग्दर्शन छान प्रकारे केले. छोट्या मुलींपासून विद्यार्थीनी व युवती आणि महिला कलाकारांनी चांगल्या तयारीने हा नाट्य प्रयोग सादर केला. श्रीकृष्ण, बलराम आणि सुदामा हे सांदिपन ऋषींच्या आश्रमात विद्या संपादन करण्यासाठी जातात आणि शेवटी कशा प्रकारे गुरू दक्षिणा अर्पण करतात याची सुंदर कथा या नाटकाने प्रेक्षकांसमोर मांडली.

कार्यक्रमाच्या प्रारंभी येथील जेष्ठ रंगकर्मी मिलिंद दांडेकर, गोवा समन्वयक भालचंद्र उसगावकर, संजय होगाडे आणि सूर्यकांत पाटील यांच्या हस्ते नटराज प्रतिमा पूजन करण्यात आले. याप्रसंगी दांडेकर यांनी उदघाटनपर मनोगत व्यक्त केले. त्यानंतर कला संचालनालय गोवा यांच्या वतीने या नाटकाच्या निर्मितीत महत्त्वपूर्ण सहभाग असलेले वासुदेव मुळगावकर, महेंद्र बांदोडकर, रुपेश शिरगावकर, हरीष अडकोणकर, सौ. मानसी सावंत, विपुल म्हार्दोळकर, विनायक नागवेकर, शाम नागवेकर, विनायक नार्वेकर यांचा मानपत्र व स्मृतिचिन्ह देऊन सत्कार करण्यात आला. त्याचबरोबर त्यांच्या वतीने स्थानिक संयोजक म्हणून दिनेश कुलकर्णी, सचिन चौधरी, कपिल पिसे आणि सूर्यकांत पाटील यांना सन्मान चिन्ह प्रदान करण्यात आले.

त्यानंतर सादर करण्यात आलेल्या संगीत नाटकात श्रवी नाईक  (कृष्ण), पूजा नाईक (सांदिपनी), रिया नाईक (बलराम), वेदिका नाईक (सुदामा), नेहा नाईक (जरासंध), निकिता कोलापटे (रक्तमुख), प्रणिता नाईक (वसुदेव), निकिता नाईक (वक्रदंत), प्रेशा नाईक (सेनापती), तन्वी नाईक (ऋषी कुमार), युग्मा नाईक (कौशिक) तसेच स्नेहा गावडे, ऋत्वी माने, विदिशा नाईक, सियेना नाईक, दिया नाईक, श्रवणी गुर्जर आणि शर्वा नाईक या कलाकारांनी आपआपल्या भूमिका उत्तम प्रकारे निभावल्या.

नाटकाचे नेपथ्य ज्ञानेश्वर नाईक यांचे, रंगभूषा एकनाथ नाईक यांची, पार्श्वसंगीत ओंकार नागेशकर यांचे तर प्रकाश योजना खेमराज पिळगावकर यांची होती. सुरुवातीला स्वागत व सूत्रसंचालन कपिल पिसे यांनी केले. शेवटी आभार प्रदर्शन पूनम मट्टीकली यांनी केले तर रंगमंच सहकार्य रेश्मा कोंडेकर यांनी केले. येथील श्रीमंत घोरपडे नाट्यगृहात झालेल्या नाटकास इचलकरंजी व परिसरातील रसिक मोठ्या संख्येने उपस्थित होते.