कला व कलेचे सादरीकरण ही जीवनासाठी आवश्यक गोष्ट होय-अ.आयुक्त सुषमा शिंदे

इचलकरंजी:

“आपल्या जीवनात उत्तम रितीने जगण्यासाठी कला आणि कलेचे सादरीकरण ही आवश्यक गोष्ट आहे‌. अशा प्रकारे सादरीकरणासाठी व्यासपीठ उपलब्ध असणेही तितकेच महत्त्वाचे आहे. एकांकिका स्पर्धेच्या माध्यमातून हे व्यासपीठ इचलकरंजीत सातत्याने उपलब्ध होत आहे ही कौतुकास्पद गोष्ट आहे. रंगमंचामुळे कलाकारांना वाव मिळतो आणि कलाकारांमुळे रंगमंच फुलत राहतो.” अशा आशयाचे उदगार इचलकरंजी महानगरपालिकेच्या अतिरिक्त आयुक्त सौ. सुषमा शिंदे यांनी काढले. उदघाटक या नात्याने त्या आपले मनोगत व्यक्त करीत होत्या.

येथील मनोरंजन मंडळ, श्री दगडूलाल मर्दा फाउंडेशन आणि रोटरी क्लब ऑफ इचलकरंजी सेंट्रल यांच्या वतीने आयोजित करण्यात आलेल्या २६ व्या मनोरंजन करंडक राज्यस्तरीय मराठी एकांकिका स्पर्धेचे उदघाटन पाहुणे व परीक्षकांच्या हस्ते नटराज प्रतिमा पूजन आणि दीप प्रज्वलन करून करण्यात आले. यावेळी नाट्य परिषद इचलकरंजी शाखेचे अध्यक्ष डॉ. एस. पी. मर्दा  हे सन्माननीय पाहुणे म्हणून उपस्थित होते. त्यांनी यावेळी शुभेच्छापर मनोगत व्यक्त करताना इचलकरंजीच्या साहित्य व कला क्षेत्रातील संयोजन परंपरेचा गौरवाने उल्लेख केला. यावेळी व्यासपीठावर ज्ञानेश मोघे गोवा, मंगेश दिवाणजी पुणे आणि यशोधन गडकरी सांगली हे मान्यवर रंगकर्मी परीक्षक म्हणून उपस्थित होते.

याप्रसंगी मर्दा फाउंडेशनचे कार्यकारी विश्वस्त शामसुंदर मर्दा यांच्या हस्ते पाहुण्यांना व परीक्षकांना गुलाब पुष्प प्रदान करण्यात आले. रोटरी क्लब सेंट्रलचे अध्यक्ष सतीश पाटील यांनी स्वागतपर मनोगत व्यक्त केले तर मनोरंजन मंडळाचे अध्यक्ष समीर गोवंडे यांनी प्रास्ताविक केले. समन्वयक संतोष आबाळे यांनी पाहुण्यांचा परिचय करून दिला तर संजीवनी कदम हिने परीक्षकांचा परिचय करून दिला. येथील श्रीमंत घोरपडे नाट्यगृहात सदरच्या कार्यक्रमासाठी इचलकरंजी व परिसरातील तसेच सांगली, कोल्हापूर येथील प्रेक्षक आणि निमंत्रित उपस्थित होते.