इंदिरा गांधी सामान्य रुग्णालयात सोमवारपासून डायलेसीस व मोतीबिंदू शस्त्रक्रिया

इंदिरा गांधी सामान्य रुग्णालयात सोमवारपासून
डायलेसीस व मोतीबिंदू शस्त्रक्रिया.

इचलकरंजी:

येथील इंदिरा गांधी सामान्य रुग्णालयातील डायलेसीस सेंटर व आदर्श ऑपरेशन थिएटरचे आरोग्यमंत्री प्रकाश आबिटकर यांच्या हस्ते लोकार्पण करण्यात आले आहे. त्यासाठी आमदार राहुल आवाडे यांनी केलेला पाठपुरावा यशस्वी ठरला असून याठिकाणी येत्या सोमवारपासून (१३ जानेवारी) मोतीबिंदू शस्त्रक्रिया व डायलेसीस सुविधा सुरु करण्यात येत आहे. या सुविधेचा लाभ आवश्यक नागरिकांना मिळणार आहे.
इचलकरंजी शहर परिसरासह हातकणंगले व शिरोळ तालुका आणि सीमावर्ती भागातील नागरिकांनी आधारवड असलेले इंदिरा गांधी सामान्य रुग्णालय हे अत्याधुनिक सुविधांनी सुसज्ज होत आहे. याकामी माजी आमदार प्रकाश आवाडे आणि आमदार राहुल आवाडे हे सातत्याने प्रयत्नशील आहेत. त्यांच्याच पाठपुराव्यात आवश्यक त्या सुविधा उपलब्ध करुन दिल्या आहेत. त्याच अनुषंगाने याठिकाणी डायलेसीस सेंटर आणि विविध ऑपरेशन थिएटर करण्यात आली आहेत. परंतु हे दोन्ही विभाग उद्घाटनाच्या प्रतिक्षेत होते. याबाबतची माहिती घेऊन आमदार राहुल आवाडे यांनी आरोग्यमंत्री प्रकाश आबिटकर यांच्याकडे पाठपुरावा करत हे विभाग तातडीने सुरु करण्याबाबतची मागणी केली होती. तर सोमवारी (६ जानेवारी) आरोग्यमंत्री आबिटकर यांनी इंदिरा गांधी सामान्य रुग्णालयास भेट देऊन पाहणी करत आढावा बैठक घेतली. याच दौर्‍यात त्यांच्या हस्ते आणि आमदार आवाडे यांच्या उपस्थितीत डायलेसीस सेंटर व आदर्श ऑपरेशन थिएटरचे उद्घाटन करण्यात आले. या दोन्ही विभागाचे प्रत्यक्षात कामकाज सोमवार १३ जानेवारीपासून सुरु होत असून याठिकाणी मोतीबिंदू शस्त्रक्रीयाही करण्यात येणार आहे. तसेच डायलेसीस सेंटरमध्येही उपचार सुरु केले जाणार आहेत.