इचलकरंजी पोलीस ठाण्याची धडाकेबाज कारवाई: चोरीच्या चार मोटारसायकलींसह १,०५,००० रुपयांचा मुद्देमाल हस्तगत.
इचलकरंजी
इचलकरंजी पोलीस ठाण्याच्या गुन्हे शोध पथकाने चोरीच्या मोटारसायकलींच्या गुन्ह्याचा छडा लावत उत्कृष्ट कामगिरी बजावली आहे. चोरीला गेलेल्या चार मोटारसायकली हस्तगत करून, एकूण १,०५,०००/- रुपयांचा मुद्देमाल जप्त करण्यात आला आहे.
संजय बाळगोंडा पाटील (वय ४५), रा. कोईक वसाहत, नांदणी रोड, शिरढोण, ता. शिरोळ यांच्या फिर्यादीनुसार १७ नोव्हेंबर २०२४ रोजी घरासमोर लावलेली मोटारसायकल चोरीस गेली होती. पोलीस फिरोज बेग यांना मिळालेल्या माहितीनुसार इचलकरंजी पोलीस ठाण्याचे गुन्हे शोध पथक पेट्रोलिंग करत असताना,हालसिद्धनाथ मंदिराजवळ सांगली रोडवर एक संशयित व्यक्ती विना नंबर प्लेट असलेल्या मोटारसायकलसह संशयीतरित्या दिसून आला. त्याला थांबवून चौकशी केली असता त्याचे नाव अल्लाउद्दीन अस्लम गोलंदाज (वय ३०),
सध्याचा पत्ता: चिपरी बेघर वसाहत, ता. शिरोळ, जि. कोल्हापूरमुळ पत्ता: विजयनगर, ता. मिरज, जि. सांगली असल्याचे समजले.तपासादरम्यान त्याने मोटारसायकल चोरीची कबुली दिली. त्याच्याकडून इतर तीन मोटारसायकलीही हस्तगत करण्यात आल्या. चोरी केलेल्या मोटारसायकली कोल्हापूर, सांगली व बेळगाव जिल्ह्यातून चोरल्याचे निष्पन्न झाले. हस्तगत केलेल्या मोटारसायकलीत हिरो होंडा सीडी डिलक्स (२५,०००/- रु.)कोईक वसाहत, शिरढोण, ता. शिरोळ येथून,हिरो होंडा एचएफ डिलक्स (२५,०००/- रु. कुडची, ता. कागवाड, जि. बेळगाव येथून,हिरो स्प्लेंडर प्लस (३०,०००/- रु.) घटप्रभा, जि. बेळगाव येथून,हिरो स्प्लेंडर प्लस (२५,०००/- रु.) विजयनगर, ता. मिरज, जि. सांगली येथून चोरी केल्याची कबुली दिली आहे.सदर कारवाई पोलीस अधिक्षक महेंद्र पंडीत, अप्पर पोलीस अधिक्षक निकेश खाटमोडे पाटील, व उपविभागीय पोलीस अधिकारी समीरसिंह साळवे यांच्या मार्गदर्शनाखाली करण्यात आली.
कारवाईत पोलीस निरीक्षक प्रमोद शिंदे, पोहेकॉ. अनिल पाटील, पोना. फिरोज बेग, पोना. विकास कुरणे, पोकॉ. अमर शिरढोणे व पोकॉ. अमित कदम यांनी सक्रिय सहभाग घेतला.
