बालभारत क्रीडा मंडळातर्फे इचलकरंजीत भव्य कबड्डी स्पर्धेचे आयोजन,किशोर वयोगटातील ४० संघांमध्ये चुरशीची लढत

इचलकरंजी :

 बालभारत क्रीडा मंडळ आणि कोल्हापूर जिल्हा कबड्डी असोसिएशनच्या मान्यतेने भव्य कबड्डी स्पर्धेचे आयोजन करण्यात आले आहे. ही स्पर्धा जेष्ठ कबड्डीपटू प्रा. डी. एन. कौंदाडे सर यांच्या ८१ व्या वाढदिवसानिमित्त आयोजित केली जात असून, आज व उद्या  बालभारत क्रीडा मंडळाच्या मैदानावर रंगणार आहे. विशेष म्हणजे, किशोर वयोगटातील तब्बल ४० संघ या स्पर्धेत सहभागी होणार आहेत, बाद पद्धतीने सामने खेळवले जाणार असून त्यामुळे कबड्डी प्रेमींसाठी हा एक अनोखा पर्वणीचा क्षण असणार आहे.

स्पर्धेचा उद्घाटन समारंभ आज १५ फेब्रुवारी रोजी दुपारी ४ वाजता होणार असून, यासाठी मा. खासदार कल्लाप्पाणा आवाडे, गणपतराव पाटील, अध्यक्ष उल्हास सूर्यवंशी आणि मार्गदर्शक राहुल खंजिरे उपस्थित राहणार आहेत. तर बक्षीस समारंभ १६फेब्रुवारी रोजी सायंकाळी ७  वाजता पार पडेल. समारोप व बक्षिस वितरण आमदार अशोकराव माने यांच्या हस्ते होणार आहे.

१९३९ मध्ये स्थापन झालेले बालभारत क्रीडा मंडळ इचलकरंजीच्या क्रीडा संस्कृतीचा महत्त्वाचा भाग राहिले आहे.या संस्थेच्या स्थापनेसाठी विष्णुपंत लायकर आणि शाळा नं. २ चे मुख्याध्यापक विष्णु कांबळे यांनी पुढाकार घेतला.संस्थेच्या माध्यमातून हिंदुराव नायकु कौंदाडे यांसारखे दिग्गज खेळाडू घडले, ज्यांनी राज्य आणि राष्ट्रीय पातळीवर कबड्डी क्षेत्रात नावलौकिक मिळवला.

संघटनेच्या या वाटचालीत गजानन जाधव,महादेव जाधव,दत्ता कौंदाडे, शिवराम शिंगाडे,ताजुद्दीन समडोळे, मिरासो समडोळे यांसारख्या अनेक खेळाडूंनी आपल्या कौशल्याने कबड्डी क्षेत्रात लौकिक मिळवला आहे. तसेच हिंदुराव कौंदाडे यांनी प्रशिक्षक आणि पंच म्हणूनही मोठे योगदान दिले.

ही भव्य स्पर्धा यशस्वी करण्यासाठी

अध्यक्ष उल्हास सूर्यवंशी,उपाध्यक्ष विजय जाधव,सेक्रेटरी आनंदा कौंदाडे,खजिनदार  मिलिंद नवनाळे

अभिजित (कार्तिक) बचाटे,अमोल सूर्यवंशी,योगेश कौंदाडे,अमित पाटील,ओंकार धुमाळ हे पदाधिकारी विशेष मेहनत घेत आहेत.

संयोजक मंडळात उत्कर्ष उल्हास सूर्यवंशी,मार्गदर्शक श्री. राहुल प्रकाश खंजिरे यांचा समावेश आहे.

या स्पर्धेत किशोर वयोगटातील ४० संघांमध्ये तीव्र चुरस पाहायला मिळणार आहे. विविध भागांतून येणारे तरुण कबड्डीपटू आपल्या कौशल्याने मैदान गाजवणार आहेत. दोन दिवस चालणाऱ्या या स्पर्धेत कबड्डी प्रेमींना रोमांचक सामने पाहायला मिळतील अशी माहिती राहुल खंजिरे व अभिजित बचाटे यांनी पत्रकार परिषदेत दिली.

बालभारत क्रीडा मंडळाच्या मैदानावर कबड्डीचा थरार अनुभवण्यासाठी क्रीडाप्रेमींनी मोठ्या संख्येने उपस्थित राहावे, असे आवाहन आयोजकांकडून करण्यात आले आहे.