स्व-रचित काव्यवाचन स्पर्धेत भारतजीवन प्रभूखोत प्रथम तर तनुजा चव्हाण द्वितीय

इचलकरंजी:

येथील मनोरंजन मंडळ, श्री दगडूलाल मर्दा फाउंडेशन आणि रोटरी क्लब ऑफ इचलकरंजी सेंट्रल यांच्या वतीने प्रतिवर्षीप्रमाणे आयोजित करण्यात आलेल्या युवा स्पंदन या स्पर्धा उपक्रमाच्या तिसऱ्या दिवशी अंतरंग – स्वरचित काव्यवाचन स्पर्धेत भारतजीवन प्रभूखोत (महावीर कॉलेज कोल्हापूर) याने प्रथम क्रमांक मिळविला तर तनुजा चव्हाण (नानासाहेब महाडिक शैक्षणिक संकुल पेठ नाका) हिने द्वितीय क्रमांक प्राप्त केला. स्पर्धेतील तृतीय क्रमांक तेजश्री शिंदे (आ. रा. पाटील कन्या महाविद्यालय इचलकरंजी) हिने तर उत्तेजनार्थ क्रमांक समृद्धी पाटील (विवेकानंद कॉलेज कोल्हापूर) आणि प्रतीक पाटील (महाडिक शैक्षणिक संकुल) यांनी मिळविले. या सर्व स्पर्धकांनी आपल्या स्व-रचित आशयपूर्ण, विविध विषयावरील कविता चांगल्या प्रकारे सादर केल्या.

काव्यवाचन स्पर्धेचे परीक्षक या नात्याने प्रसिद्ध वक्ते आणि युवा कवी विजय काळे कागल, रोहीत शिंगे इचलकरंजी आणि गौतम कांबळे, सांगली यांनी उत्तम प्रकारे जबाबदारी पार पाडली. या स्पर्धेचा पारितोषिक वितरण समारंभ सर्व परीक्षक तसेच मनोरंजन मंडळाचे अध्यक्ष समीर गोवंडे, माजी अध्यक्ष अशोक बोरगावकर, रोटरी क्लब इचलकरंजी सेंट्रलचे सेक्रेटरी नागेश दिवटे, स्पर्धा समन्वयक संजय होगाडे आणि कवी पाटलोबा पाटील यांच्या हस्ते संपन्न झाला.

याप्रसंगी परीक्षक या नात्याने बोलताना “आपली कविता चांगली होण्यासाठी आपण भरपूर वाचन करणे आवश्यक आहे, त्याचबरोबर अधिकाधिक ऐकणेही आवश्यक आहे. कविता केवळ स्वतःच्या आनंदासाठी असण्यापेक्षा त्यामधून समाजासाठी काहीतरी आशयही मिळावा. त्याकरिता आपली कविता वारंवार वाचून पाहावी आणि नंतर कवितेला अंतिम रूप द्यावे. आपल्या कवितेवर वक्तृत्वाचा ठसा असू नये आणि ती अनावश्यक मोठी असू नये.” अशा आशयाचे मार्गदर्शन तीनही परीक्षकांनी केले. स्पर्धेच्या सुरुवातीला स्वागत व प्रास्ताविक संजय होगाडे यांनी केले तर परीक्षकांचा परिचय व आभार प्रदर्शन पंडित ढवळे यांनी केले. स्पर्धेचे सूत्र संचालन अमोल कदम आणि अंकुश गरगटे यांनी केले. येथील श्री दगडूलाल मर्दा मानव सेवा केंद्र सभागृहात सदरची स्पर्धा पार पडली.