युवास्पंदन – अभिवाचन स्पर्धेत ऋतूराज आमते प्रथम तर रीद्दी कुलकर्णी द्वितीय

इचलकरंजी:

मराठी साहित्यातील ज्ञानपीठ पुरस्कार प्राप्त दिग्गज अशा वि. स. खांडेकर व भालचंद्र नेमाडे यांच्या तसेच आजच्या पिढीतील साहित्यिकांच्या विविध प्रकारच्या ललित साहित्याचे प्रभावशाली अभिवाचन युवा स्पर्धकांनी  केले. यामध्ये ऋतुराज आमते (न्यू पॉलिटेक्निक, कोल्हापूर) याने प्रथम क्रमांक मिळविला तर पुण्याच्या डॉ. रिद्धी कुलकर्णी यांनी द्वितीय क्रमांक मिळविला.

युवा स्पंदन उपक्रमातील शब्दरंग – साहित्य अभिवाचन स्पर्धेतील तृतीय क्रमांक मानसी कुलकर्णी (कन्या महाविद्यालय, इचलकरंजी) हिने प्राप्त केला तर उत्तेजनार्थ पारितोषिके भारतजीवन प्रभूखोत (महावीर कॉलेज, कोल्हापूर) आणि प्रतिक हुंद्रे (डांगे कॉलेज, हातकणंगले) यांनी मिळविली.

येथील मनोरंजन मंडळ, श्री दगडूलाल मर्दा फौंडेशन आणि रोटरी क्लब ऑफ इचलकरंजी सेंट्रल यांच्या वतीने दरवर्षीप्रमाणे आयोजित केलेल्या युवा स्पंदन या पाच दिवसीय स्पर्धा उपक्रमात दुसऱ्या दिवशी इचलकरंजी, कोल्हापूर, सांगली, पुणे या भागातील स्पर्धकांनी सहभाग घेतला.

स्पर्धेचे परीक्षक या नात्याने प्रा. अशोक दास इचलकरंजी व यशवंत कुलकर्णी आणि वरुण जाधव सांगली यांनी उत्तमरीत्या आपली जबाबदारी पार पाडली. ‌सुरुवातीला परीक्षकांच्या हस्ते नटराज प्रतिमेस पुष्पहार अर्पण करण्यात आला. यावेळी स्वागत आणि परीक्षकांचा परिचय पंडित ढवळे यांनी करुन दिला तर मनोरंजन मंडळाचे अध्यक्ष समीर गोवंडे यांनी प्रास्ताविक केले. स्पर्धेच्या शेवट सत्रात परीक्षक आणि रोटरी क्लब सेंट्रलचे सेक्रेटरी नागेश दिवटे तसेच स्पर्धा समन्वयक संजय होगाडे यांच्या हस्ते पारितोषिक वितरण समारंभ संपन्न झाला.

यावेळी तीनही परीक्षकांनी स्पर्धकांसाठी उपयुक्त ठरेल असे  मार्गदर्शनपर मनोगत व्यक्त केले. सकस साहित्य वाचन, शब्दोच्चार, वाचनातील विराम, आवाजाचा पोत, सादरीकरण, इत्यादी गोष्टींकडे स्पर्धकांनी लक्ष द्यावे अशी माहिती त्यांनी दिली. अभिवाचन स्पर्धेचे सूत्र संचालन संजिवनी कदम आणि निखिल शिंदे यांनी केले तर महेश सोलापूरे व कपिल पिसे यांनी व्यवस्थापन केले. येथील रोटरी श्री दगडूलाल मर्दा मानव सेवा केंद्र सभागृहात सदरचा कार्यक्रम पार पडला.