इचलकरंजीत इन्स्टाग्राम मेसेजवरून दोन गटात मारामारी, तलवारीने तोडफोड करत दहशत माजवण्याचा प्रयत्न.दोन्ही गटांवर गुन्हे दाखल, सहा जण ताब्यात

इचलकरंजी:

 शहरातील शेळके मळा,एमइसीबी जवळ येथे दहशत माजवणाऱ्या ६ जणांवर शिवाजीनगर पोलीस ठाण्यात गुन्हा दाखल करण्यात आला आहे. तसेच, दुसऱ्या गटाने त्याच कारणावरून झालेल्या वादात एका युवकाला मारहाण केल्याचा प्रकार उघडकीस आला आहे. या दोन्ही घटनांमुळे परिसरात तणाव निर्माण झाला असून, पोलिसांनी सहा जणांना ताब्यात घेतले आहे.

फिर्यादी महिलेने  दिलेल्या तक्रारीनुसार, श्रेयश पोळ आणि त्याच्या ५-६ साथीदारांनी सोमवारी रात्री ८ च्या सुमारास  मोटरसायकलवर येऊन दहशत माजवली. आरोपींनी हातात तलवारी, काठ्या आणि दगड घेत गल्लीमध्ये आरडाओरडा करत पाणीपुरी गाड्याची तोडफोड केली.

या हल्ल्यात फिर्यादीच्या नवऱ्याला जीवे मारण्याचा प्रयत्न करण्यात आला. तसेच फिर्यादीच्या स्त्री मनाला लज्जा उत्पन्न होईल असे कृत्य आरोपींनी केले,घरांवर दगडफेक केली आणि वीज मीटरच्या काचेच्या पेट्या फोडल्या. यामुळे परिसरात काही काळ तणाव निर्माण झाला.

या घटनेनंतर श्रेयश दीपक पोळ (वय २१, व्यवसाय – कॅफे, रा. अष्टविनायक कॉलनी, शेळके मळा, इचलकरंजी) यांनीही शिवाजीनगर पोलिसांकडे तक्रार दाखल केली आहे. त्यांच्या तक्रारीनुसार, संजय माने आणि संजय परीट यांनी त्यांना त्यांच्या राहत्या घरासमोर बोलावले आणि इन्स्टाग्राम मेसेज का केला, या कारणावरून वाद घालून मारहाण केली.

तक्रारीनुसार, फिर्यादी श्रेयश पोळ हे आरोपींच्या घरी गेल्यानंतर, संजय माने आणि संजय परीट यांनी त्यांना शिवीगाळ केली आणि लाकडी बॅटने पायावर, डोक्यावर, छातीवर आणि पाठीवर मारहाण केली. तसेच, “माझ्या मुलीच्या नादाला लागलास तर तुला सोडणार नाही,” अशी धमकीही दिली.या प्रकरणी गुन्हा दाखल करण्यात आला आहे. वरील गुन्ह्याचा तपास पो नि सचिन पाटील यांच्या मार्गदर्शनाखाली ,स.फौ.कराड व स फौ. आबिटकर  करत आहेत.

याबाबत पोलिसांनी गतीने तपासाची चक्रे फिरवत श्रेयश दीपक पोळ (वय २१) अविनाश रमेश कदम (वय २१)रा. शेळके मळा.सागर लक्ष्मण गायकवाड (वय २० ) व समीर अल्लाबक्ष मणेर (वय १९) रा. साखरपे हॉस्पिटल जवळ, पोवार मळा,पार्थ प्रवीण कांबळे (वय १९, रा. कामगार चाळ, इचलकरंजी)वैभव दिलीप कांबळे (वय २४, रा. दाते मळा.इचलकरंजी यांना ताब्यात घेतले आहे.