रस्त्याच्या कामावरून वाद — माजी उपनगराध्यक्षावर अदखलपात्र गुन्हा दाखल

इचलकरंजी :

 शहरातील नारळ चौक परिसरात आमदार निधीतून सुरू असलेल्या रस्त्याच्या कामावरून झालेल्या वादात सामाजिक कार्यकर्त्यावर शिवीगाळ व मारहाण केल्याप्रकरणी माजी उपनगराध्यक्ष प्रकाश मोरबाळे यांच्या विरोधात शिवाजीनगर पोलीस ठाण्यात अदखलपात्र गुन्हा दाखल करण्यात आला आहे.

यासंदर्भात संतोष सदाशिव कांदेकर (वय ४४, रा. गोंधळी गल्ली, आय. जी. एम. हॉस्पिटल शेजारी, इचलकरंजी) यांनी फिर्याद दिली आहे.आरोपी प्रकाश मोरबाळे (रा. गोकुळ चौक, आय. जी. एम. हॉस्पिटल शेजारी, इचलकरंजी) यांनी मंगळवारी सकाळी १०.४५ वाजण्याच्या सुमारास नारळ चौक दुर्गा मंदिराच्या मागील रस्त्यावर वाद घालून शिवीगाळ केली व अंगावर धावून जाऊन मारहाण करण्याचा प्रयत्न केला, असे फिर्यादीत नमूद आहे.

या प्रकरणी गुन्हा दाखल करण्यात आला असून पुढील तपास पोलीस हेडकॉन्स्टेबल चोथे हे करत आहेत.