जवाहरनगरमध्ये गाडीच्या देवाणघेवाणीवरून हाणामारी — परस्परविरोधी फिर्यादी, दोन्ही गटांविरोधात गुन्हे दाखल
इचलकरंजी : शहरातील जवाहरनगर परिसरात गाडीच्या देवाणघेवाणीवरून झालेल्या वादातून दोन गटांमध्ये जोरदार हाणामारी झाली. या प्रकरणात दोन्ही गटांनी एकमेकांविरोधात शिवाजीनगर पोलीस ठाण्यात फिर्यादी दाखल केल्या असून, पोलिसांनी परस्परविरोधी गुन्हे नोंदवत पुढील तपास सुरू केला आहे.
प्रकरणातील पहिली फिर्याद याकुब बाबु नायकवडे (वय २२, रा. म्हसोबा गल्ली नं.२, जवाहरनगर) यांनी दिली असून, त्यानुसार १४ एप्रिल रोजी रात्रीच्या सुमारास राजमाता जिजाऊ क्रिडांगण परिसरात आरोपी आसिफ सलीम मुजावर (वय २५) याने पैशाच्या कारणावरून वाद घालत त्याचा आणि मित्रांचा मोबाईल बळजबरीने हिसकावून घेतला. मोबाईल मागितल्यावर आरोपीने गाडीच्या डिगीतून चाकू काढून फिर्यादीवर हल्ला केला. या हल्ल्यात फिर्यादीच्या डाव्या हाताच्या मनगटावर गंभीर जखम झाली असून आरोपीने मोबाईल हिसकावून नेल्याचा आरोप फिर्यादीने केला आहे.
तर दुसऱ्या घटनेत, प्रफुल्ल सुनील जाधव (वय 32, रा. गणपती कट्टा, जवाहरनगर) यांनी फिर्याद दाखल करत सांगितले की, त्यांचा मित्र आसिफ मुजावर याच्याकडे दिलेली मोटारसायकल परत मिळवण्यासाठी तो अक्षय बार हॉटेल समोर गेला असता, तेथे उपस्थित आरोपी वैभव कडलिमट्टी व त्याच्या सोबत असलेल्या इम्रान फारूख कलेगार वय २५ -जवाहर नगर म्हसोबा गल्ली,दक्ष शंकर वडर वय १८ जवाहरनगर वडर गल्ली यांनी गाडी दिल्याच्या कारणावरून जाब विचारत त्याच्यावर लाकडी काठीने व लाथाबुक्क्यांनी मारहाण केली. या मारहाणीत फिर्यादी गंभीर जखमी झाला आहे.
या दोन्ही गुन्ह्यांत परस्परविरोधी आरोप झाल्याने पोलीसांनी संबंधित आरोपीविरोधात गुन्हे दाखल केले असून, प्रकरणाचा अधिक तपास सपोनि परुळे व सपोनि आबीटकर यांच्या मार्गदर्शनाखाली तपास सुरू आहे
