महापालिकेच्या मालकीचा मुरूम, खडी बेकायदेशीररीत्या उचलून नेल्याचा प्रकार उघड — १५० ते २०० डंपरने वाहतूक!
इचलकरंजी :
इचलकरंजी महापालिकेच्या हद्दीतील सांगली रोड परिसरात सार्वजनिक बांधकाम विभागामार्फत सुरू असलेल्या रस्ते मजबुतीकरण व डांबरीकरण कामातून उत्खनन झालेला मुरूम, खडी व इतर साहित्य महापालिकेच्या परवानगीशिवाय संबंधित मक्तेदारांकडून बेकायदेशीररीत्या उचलून नेल्याचा गंभीर प्रकार उघड झाला आहे.या संदर्भात स्थानिक नागरिक उमाकांत दाभोळे यांनी महापालिका आयुक्तांकडे तक्रार दाखल केली आहे. तक्रारीनुसार सुमारे १५० ते २०० डंपर मुरूम व खडी स्थलांतरित करण्यात आली असून, यासाठी महापालिकेची परवानगी घेण्यात आलेली नव्हती. याबाबत जेसीबी व डंपर चालकांकडे विचारणा केली असता, सदर साहित्य सार्वजनिक बांधकाम विभागाच्या कोल्हापूर रस्त्यावर कामासाठी नेत असल्याची माहिती देण्यात आली. मात्र, महापालिकेच्या अधिकाऱ्यांकडून अशा प्रकारची कोणतीही परवानगी दिली नसल्याचे स्पष्ट करण्यात आले आहे.
या प्रकारामुळे महापालिकेच्या मालकीच्या सार्वजनिक मालमत्तेची बेकायदेशीर विल्हेवाट लावल्याचा आरोप झाला आहे. तक्रारदार दाभोळे यांनी या प्रकरणाची चौकशी करून संबंधित मक्तेदाराकडून मुरूम व खडीचे मूल्य वसूल करण्याची तसेच जबाबदार व्यक्तींवर कारवाई करण्याची मागणी आयुक्तांकडे केली आहे.
Author: ICHMH51 NEWS ABHIJIT PATWA
घडामोडी वस्त्रनगरीच्या... इचलकरंजी शहरातील चालू घडामोडी, ब्रेकिंग न्यूज आपल्याला समजाव्यात यासाठी हे पोर्टल सुरू केले असून नागरी समस्यांना वाचा फोडून त्या मार्गी लावण्यासाठी आम्ही प्रयत्नशील आहोत. अधिक माहिती,बातम्या व जाहिरातीसाठी संपर्क- अभिजित राजेंद्र पटवा,इचलकरंजी. 9921600800
