इचलकरंजीत दिवसाढवळ्या मंगळसूत्र चोरले  — दोन अज्ञात चोरट्यांविरोधात गुन्हा दाखल

इचलकरंजीत दिवसाढवळ्या मंगळसूत्र चोरले  — दोन अज्ञात चोरट्यांविरोधात गुन्हा दाखल

इचलकरंजी — इचलकरंजी शहरातील सोलगे मळा परिसरात स्वयंभू शिव मंदिराजवळ एका महिलेची गळ्यातील सोनसाखळी हिसडा मारून चोरी केल्याची धक्कादायक घटना गुरुवारी सकाळी घडली. याप्रकरणी दोन अज्ञात इसमांविरुद्ध इचलकरंजी पोलीस ठाण्यात गुन्हा दाखल करण्यात आला आहे.

फिर्यादी सौ. वृषाली शशिकांत जाधव (वय ४०, रा. सोलगे मळा, दत्तमंदिर शेजारी, एकता कॉलनी, इचलकरंजी) यांनी पोलिसांत दिलेल्या तक्रारीनुसार, त्या आपल्या मुलीस क्लासला सोडून घरी येत होत्या. दरम्यान, स्वयंभू शिव मंदिराजवळ रोडवर त्यांच्या इलेक्ट्रीक दुचाकीला दोन अज्ञात इसमांनी काळ्या रंगाच्या दुचाकीने आडवे मारून थांबवले. पत्ता विचारण्याच्या बहाण्याने संगनमत करून मागे बसलेल्या चोरट्याने त्यांच्या गळ्यातील अंदाजे १० ग्रॅम वजनाचे मिनी मंगळसूत्र हिसडा मारून जबरदस्तीने चोरी केले.

चोरी दरम्यान मंगळसूत्राचा अर्धा तुकडा चोरट्यांच्या हातात राहिला तर उरलेला भाग त्यांच्या गळ्यातच राहिला. घटनेनंतर आरोपी काळ्या रंगाच्या दुचाकीवरून घटनास्थळावरून फरार झाले.

या घटनेची नोंद इचलकरंजी पोलीस ठाण्यात झाली आहे. तपास पोलीस निरीक्षक महेश चव्हाण करत आहेत