घनकचरा व्यवस्थापनाचा २२ कोटीच्या  बेकायदेशीर ठरावाची अंमलबजावणी करू नये : शशांक बावचकर

घनकचरा व्यवस्थापनाचा २२ कोटीच्या  बेकायदेशीर ठरावाची अंमलबजावणी करू नये : शशांक बावचकर

इचलकरंजी :

इचलकरंजी महानगरपालिकेच्या २७ जुलै २०२६ रोजी झालेल्या विशेष महासभेत मंजूर करण्यात आलेला घनकचरा व्यवस्थापनाचा २२ कोटी रुपयांचा अंदाजपत्रकाचा ठराव बेकायदेशीर असून त्याची अंमलबजावणी करू नये, अन्यथा न्यायालयात दाद मागण्यात येईल, असा इशारा माजी नगरसेवक तथा अखिल भारतीय काँग्रेस पक्षाचे प्रदेश सरचिटणीस शशांक बावचकर यांनी आयुक्तांना दिलेल्या निवेदनातून दिला आहे.

निवेदनात म्हटले आहे की, १५ जुलै २०२६ रोजी झालेल्या स्थायी समितीच्या बैठकीत घनकचरा व्यवस्थापनाचा २२ कोटी रुपयांचा अंदाजपत्रकाचा विषय बहुमताने नामंजूर झाला होता. मात्र अवघ्या १२ दिवसांत तोच विषय २७ जुलैच्या विशेष महासभेत मंजुरीसाठी ठेवून २४ उपस्थित सदस्यांच्या एकमताने मंजूर करण्यात आला.

महाराष्ट्र महानगरपालिका अधिनियम, १९४९ मधील अनुसूची ‘ड’तील तरतुदीनुसार तीन महिन्यांच्या आत अशा ठरावात फेरबदल करण्यासाठी विशिष्ट प्रक्रिया व आवश्यक सदस्यसंख्येचा पाठिंबा बंधनकारक आहे. तसेच ठरावातील बदलाबाबतची सूचना व प्रस्तावही नोटिशीत नमूद करणे आवश्यक असते. या सर्व कायदेशीर प्रक्रियेचे पालन न करता ठराव मंजूर करण्यात आल्याचा दावा बावचकर यांनी केला असून, सदर ठरावाची अंमलबजावणी थांबविण्याची मागणी केली आहे.निवेदनाच्या प्रती महापौर,उपमहापौर,विरोधीपक्ष नेते यांना देण्यात आलेल्या आहेत.