मान्यवरांच्या उपस्थितीत भाजपाचे उमेदवार राहुल आवाडे आज अर्ज दाखल करणार

इचलकरंजी –

२७९-इचलकरंजी विधानसभा मतदारसंघातील भारतीय जनता पार्टीचे अधिकृत उमेदवार राहुल प्रकाश आवाडे हे गुरुवार २४ ऑक्टोबर रोजी गुरुपुष्यमृत योगावर विविध मान्यवरांच्या उपस्थितीत व प्रचंड जनसमुदायाच्या साक्षीने आपला उमेदवारी अर्ज दाखल करणार आहेत.

सकाळी ९ वाजता महात्मा गांधी पुतळा येथून उमेदवारी अर्ज दाखल करण्यासाठी रॅलीला सुरुवात होईल. त्यानंतर कॉ. मलाबादे चौक तेथून श्री शिवर्तीथ आणि प्रांत कार्यालय असा रॅलीचा मार्ग असणार आहे. या रॅलीमध्ये उमेदवार राहुल आवाडे यांच्या समवेत खासदार धैर्यशील माने, आमदार प्रकाश आवाडे, भाजपा प्रदेश उपाध्यक्ष सुरेशराव हाळवणकर, शिवसेना जिल्हाप्रमुख रवींद्र माने, राष्ट्रवादी काँग्रेस पार्टी शहर जिल्हाध्यक्ष विठ्ठल चोपडे यांच्यासह महायुती घटक पक्षातील मान्यवरांची उपस्थित असणार आहे, अशी माहिती प्रकाश दत्तवाडे यांनी दिली.

राहुल आवाडे हे यापूर्वी जिल्हा परिषद सदस्य होते. त्यांनी आपल्या कार्यकाळात मतदारसंघाचा शासनाच्य विविध योजनांद्वारे भरघोस निधी आणून कायपालट केला आहे. आता हे इचलकरंजी विधानसभा मतदारसंघातून आमदारकीसाठी भाजपातर्फे लढत आहेत. इचलकरंजी विधानसभा मतदारसंघाचा निवडणूक कार्यक्रम जाहीर झाला असून मंगळवारपासून उमेदवारी अर्ज दाखल करण्यात येत आहेत. भारतीय जनता पार्टी तर्फे राहुल आवाडे यांना उमेदवारी जाहीर झाली असून गुरुवारी ते विविध ज्येष्ठ नेत्यांच्या उपस्थितीत व असंख्य कार्यकर्ते, समर्थकांच्या उपस्थितीत अर्ज दाखल करणार आहेत.