घनश्याम इनानी यांच्या कार्यालयावर दगडफेक; तिघांसह १५ जणांवर गुन्हा

इचलकरंजी :

यंत्रमाग कामगारांच्या मजुरीवाढ आंदोलनाच्या पार्श्वभूमीवर कापड व्यापारी घनश्याम इनानी यांच्या कार्यालयावर झालेल्या दगडफेक प्रकरणी शिवाजीनगर पोलिस ठाण्यात गुन्हा दाखल करण्यात आला आहे. याप्रकरणी शिवसेना प्रणित महाराष्ट्र सेना संघटनेचे अध्यक्ष नंदकुमार लोखंडे, कोल्हापूर जिल्हा पॉवरलूम असोसिएशनचे अध्यक्ष शहाजी भोसले, विशाल पाडेकर यांच्यासह १० ते १५ अनोळखी व्यक्तींविरोधात गुन्हा नोंदविण्यात आला आहे.

पोलिसांनी दिलेल्या माहितीनुसार, शनिवारी (दि. २३) सायंकाळी पाचच्या सुमारास विवेकानंद कॉलनीतील घनश्याम इनानी यांच्या कार्यालयासमोर मजुरीवाढीच्या मुद्द्यावरून जमाव जमला. या जमावाने कार्यालयावर दगडफेक केल्याचा आरोप फिर्यादीत करण्यात आला आहे. घनश्याम मुलचंद इनानी (वय ७५) यांनी दिलेल्या फिर्यादीवरून दाखल गुन्ह्याचा तपास  पोलीस उपनिरीक्षक वाघमारे करीत आहेत.