१ जानेवारी पासून समाशोधन (क्लिअरींग) ज्या-त्या दिवशी जमा होणार – दि इचलकरंजी पॉवरलुम असोसिएशनच्या प्रयत्नांना यश

इचलकरंजी

दि इचलकरंजी पॉवरलुम असोसिएशनने सातत्याने केलेल्या समाशोधन (क्लिअरींग) रोजच्या रोज जमा करणेच्या मागणीस रिझर्व्ह बँक ऑफ इंडियाच्या बोर्डाने मान्य करणेचा निर्णय घेतलेचे रिझर्व्ह बँक ऑफ इंडियाच्या अधिकाऱ्यांनी कांही दिवसांपूर्वी दि इचलकरंजी पॉवरलुम असोसिएशनला कळविले होते. त्याची प्रत्यक्ष अंमलबजावणी १ जानेवारी २०२५ पासून सर्व राष्ट्रीयकृत, व्यापारी, सहकारी बँका व इतर वित्तीय संस्थांमध्ये सुरू होत आहे.

दि. २२ सप्टेंबर २०२२ रोजी दि इचलकरंजी पॉवरलुम असोसिएशनने रिझर्व्ह बँक ऑफ इंडिया व जिल्हा अग्रणी बँकेच्या प्रमुखांकडे ज्या-त्या दिवशी समाशोधन (क्लिअरींग) जमा मिळावे यासाठी पत्रव्यवहार व प्रत्यक्ष भेटून चर्चा केली होती. यातील तांत्रिक अडचणींबाबत सविस्तर चर्चा झाली होती. गेल्या दोन ते तीन वर्षातील सातत्यपूर्ण पाठपुराव्यानंतर कांही महिन्यांपूर्वी रिझर्व्ह बँक ऑफ इंडियाने समाशोधन (क्लिअरींग) रोजच्या रोज जमा देणेविषयी बँकींग क्षेत्रातील ऐतिहासिक निर्णय घेतला व तसे दि इचलकरंजी पॉवरलुम असोसिएशनला कळविले होते. मध्यंतरीच्या कालावधीत सर्व बँकांना त्यांच्या सॉफटवेअरमध्ये बदल, कर्मचारी प्रशिक्षण, तांत्रिक माहिती, कार्यशाळा इ.चे आयोजन करून आता १ जानेवारी २०२५ पासून रोजच्या रोज समाशोधन (क्लिअरींग) जमा मिळणेचा मार्ग मोकळा झाला आहे. या बदलामुळे फक्त इचलकरंजीमध्ये ७५ ते १०० कोटी रूपये अतिरिक्त रोज उपलब्ध होणार आहेत.

यापूर्वीही इचलकरंजीतून अनेक ऐतिहासिक निर्णयाची नांदी झालेली आहे. बँकिय क्षेत्रातील रोजच्या रोज समाशोधन (क्लिअरींग) मिळणे हा एक ऐतिहासिक निर्णय इचलकरंजीकरांच्या प्रयत्नामुळे संपूर्ण भारताला मिळतो आहे. या निर्णयामुळे भांडवलाची अतिरिक्त उपलब्धता झालेने उद्योग व व्यापार करणे सोईस्कर होणार आहे. त्याचबरोबर कर्जावरील व्याजाची बचत होणार आहे. यापूर्वी समाशोधन (क्लिअरींग) साठी चेक बँकेत जमा केलेनंतर संबंधीत रक्कम तिसऱ्या दिवशी आणि जर बँकेस सुट्टी असेल तर ती चौथ्या किंवा पाचव्या दिवशी पैसे वापरात येत होते. परंतू या निर्णयामुळे आता तीन तासाच्या सायकलमध्ये ज्या-त्या दिवशी पैसे खात्यावर जमा होणार आहेत. व ते पुढील व्यवहारासाठी वापरता येणार आहेत. या निर्णयाबद्दल रिझर्व्ह बँक ऑफ इंडिया व जिल्हा अग्रणी बँकेचे अधिकारी यांचे दि इचलकरंजी पॉवरलुम असोसिएशनचे अध्यक्ष चंद्रकांत पाटील यांनी आभार मानले आहेत.