इचलकरंजीत आज मराठी साहित्य संमेलनाचा स्मृती जागर

इचलकरंजीत आज मराठी साहित्य संमेलनाचा स्मृती जागर
इचलकरंजी:
इचलकरंजीत सन  १९७४ मध्ये झालेल्या सुवर्णमहोत्सवी मराठी साहित्य संमेलनपूर्तीच्या सुवर्ण महोत्सवाचे औचित्य साधत वस्त्रनगरीत त्याच्या स्मृती जागविल्या जात आहेत. त्यानिमित्ताने गुरुवार २६ डिसेंबर रोजी डीकेटीई राजवाडा दरबार हॉलमध्ये ‘सुवर्णमहोत्सवी स्मृती जागर कार्यक्रम’ आयोजित करण्यात आला आहे.
इचलकरंजी राजवाडा याठिकाणी होणार्‍या या कार्यक्रमाचे उद्घाटन सहकार महर्षि कल्लाप्पाण्णा आवाडे यांच्या हस्ते आणि ज्येष्ठ साहित्यिक डॉ. सुनिलकुमार लवटे यांच्या प्रमुख उपस्थितीत होत आहे. याप्रसंगी आमदार डॉ. राहुल आवाडे, जिल्हा ग्रंथालय अधिकारी अपर्णा वाईकर यांची उपस्थिती असणार आहे. सुवर्णमहोत्सवी साहित्य संमेलनाच्या सुवर्णमहोत्सवी स्मृती जागर कार्यक्रमाच्या निमित्ताने सकाळी ९.३० वाजता गोविंदराव हायस्कूलच्या प्रांगणातून ग्रंथ दिंडी काढण्यात येणार आहे. त्यानंतर राजवाडा दरबार हॉलमध्ये दिंडी पोहचल्यानंतर १०.३० ते दुपारी १ या वेळेत मुख्य कार्यक्रम होईल. याचदिवशी सायंकाळी ६ वाजता पंडित बाळकृष्णबुवा संगीत साधना मंडळाच्या वतीने श्रीमती मंगला जोशी व त्यांचे शिष्य अभिषेक काळे व श्रध्दा जोशी यांचा दर्जेदार संगीताचा कार्यक्रम होणार आहे.