इचलकरंजीत कानाच्या दोषांची तपासणी व शस्त्रक्रिया शिबिर

इचलकरंजी:

येथील इनरव्हील क्लब, रोटरी क्लब सेंट्रल, रोटरी क्लब हेरिटेज, इंदिरा गांधी सामान्य रुग्णालय, श्री दगडूलाल मर्दा चॅरिटेबल व रिसर्च फौंडेशन, ग्रोवेल सोलर एनर्जी प्रा. ली. (सी.ए. भुतडा) यांच्या संयुक्त विद्यमाने आणि एओआय विदर्भ, शाखा नागपूर यांच्या सहकार्याने इचलकरंजी येथे ‘कानाच्या दोषांचे रोगनिदान आणि उपचार व शस्त्रक्रिया शिबिर’ आयोजित करण्यात आले आहे. सदरच्या शिबिरामध्ये ऐकू न येणे, (बहिरेपणा), ऐकू कमी येणे, कानात किडे होणे, कानातून पाणी येणे, कानातून पू येणे किंवा रक्त येणे, इत्यादी कानदोषांची मोफत तपासणी करण्यात येणार आहे.

सदरच्या शिबिरामध्ये तपासणी व शस्त्रक्रिया करण्यासाठी प्रो. डॉ. देवेंद्र माहोरे (जीएमसी नागपूरचे इएनटी विभाग प्रमुख) श डॉ. नंदू कोलवाडकर नागपूर (नॅशनल इएनटी असोसिएशन ऑफ इंडियाचे माजी अध्यक्ष) डॉ. समीर चौधरी (इएनटी असोसिएशन ऑफ इंडियाचे ऑनररी सेक्रेटरी) आणि डॉ. जीवन वेदी (इएनटी विभाग प्रमुख, आयजीजीएमसी, नागपूर) हे अनुभवी नाक, कान व घसा तज्ज्ञ सर्जन उपस्थित राहणार आहेत.

शिबिरासाठी प्राथमिक तपासणी आवश्यक असून ती रविवार दिनांक ९ फेब्रुवारी २०२५ रोजी सकाळी १० ते दुपारी २•३० वाजेपर्यंत रोटरी श्री दगडूलाल मर्दा मानव सेवा केंद्र, नाकोडा नगर, निरामय हॉस्पिटलजवळ, इचलकरंजी येथे होणार आहे. मर्यादित जागेमुळे इच्छुक रुग्णांनी याच ठिकाणी नाव नोंदणी करणे आवश्यक आहे. तपासणीनंतर निवड करण्यात आलेल्या रुग्णांवर दिनांक १४, १५ आणि १६ फेब्रुवारी २०२५ या कालावधीत इंदिरा गांधी सामान्य रुग्णालय येथे अत्यल्प खर्चात शस्त्रक्रिया करण्यात येणार आहेत. तरी इचलकरंजी व परिसर तसेच कोल्हापूर जिल्ह्यामधील आणि सीमा भागातील इच्छुक रुग्णांनी या शिबिराचा लाभ घ्यावा असे आवाहन संयोजकांच्या वतीने करण्यात आले आहे.